खोजखबर संवाददाता
बाँके असार २२ गते । नागरिक आवास समन्वय समिति बाँके द्वारा जिल्लाका दुई हजार सात सय फुसका छाना भएका घरलाई फुस रहित बनाउने उदेश्यले सञ्चालन गरिएको सुरक्षित नागरिक आवास कार्यक्रमको प्रमाण पत्र वितरण गर्ने कार्यक्रम आज देखि शुरु गरिएको छ । सो प्रमाण पत्र बाँकेका ४ ओटा स्थानीय तहका विपन्न परिवारलाई वितरण गर्न शुरु गरिएको छ ।
नेपालगन्ज उपमहानगरपालिकामा १४ सय घरधुरी, डुडवा गाँउपालिकामा ७०० घरधुरी, जानकी गाँउपालिकामा ३०० घरधुरीर नरैनापुर गाँउपालिकामा ३०० घरधुरी गरी बाँकेका जम्मा २७०० घरधुरीलाई फुसरहित बनाउने सरकारको लक्ष्य छ ।
सो कार्यक्रम अन्तर्गत एक घरधुरीलाई ५० हजार बराबरको रकम उपलब्ध गराइने छ । कार्यक्रमका लागि छनोटमा परेकाहरुलाई २ किस्तामा रकम वितरण गरिने भएको छ । पहिलो किस्तामा ३० हजार र दोस्रो किस्ता घरमा जास्तापाताको छानो लागाई सकेको प्रमाण पेश गरेपश्चात भुत्तानी पाउने व्यवस्था गरिएको शहरी विकास मन्त्री तथा बाँके क्षेत्र नं २ सांसद मोहम्मद इस्तियाक राईले बताउनुभयो ।
नेपालगन्ज उपमहानगरपालिका भित्र शहरी विकास मन्त्रालयको सहयोग मा ८ ओटा हाईमास लाईटको जडान कार्य शरु भईसकेको र ५० ओटा हाईमास लाईटको बजेट निकासा भई टेन्डर हुने प्रक्रियामा रहेको मन्त्री राईले बताउनुभयो । नेपालगन्ज उपमहानगरपालिकालाई नमुना शहर बनाउने अठोटका साथ सरकार अघि बढिरहेको जनाउँदै मन्त्री राईले त्यसमा स्थानीय सरकारको पनि पूर्ण सहयोग पाईरहेको बताउनु भयो ।
बाँकेका अधिकांश क्षेत्रहरुमा फुसको घर भएकै कारणले बर्सेनी आगलागी हुने र गाँउ नै जलेर नस्ट हुने घट्नाहरु अत्याधिक हुने गरेका छन् ।
त्यसलाई नियन्त्रण गर्न र जनतालाई सुबिधा दिनको लागी सुरक्षित नागरिक आवास कार्यक्रम ल्याइएको भन्दै शहरी विकास मन्त्री राईले यस कार्यक्रमबाट तराई मधेशमा ठुलो फाइदा पुग्ने बताउनु भयो ।
सुरक्षित नागरिक आवास कार्यक्रम ल्याएकोमा नगरपालिकाको तर्फबाट उपमहानगरपालिका प्रमुख डा. धवल शम्शेर राणाले मन्त्री राईलाई धन्यवाद दिंदै उपमहानगरपालिकाले तयार गरेका योजनामा पनि सहकार्य गर्न आग्रह गर्नुभयो ।
Discussion about this post