बाँके, असोज १६ गते ।
बाँकेमा घरेलु हिंसासम्बन्धी अधिकांश उजुरी मिलापत्रमार्फत टुंग्याउने गरिएको छ । जिल्ला प्रहरी कार्यालय बाँकेका अनुसार साउन र भदौमा घरेलु हिंसासम्बन्धी १०८ वटा उजुरी परेकामा १०४ वटा मिलापत्रबाट समाधान भएका छन् ।
जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतित सिंह राठौरले धेरै प्रयास गर्दा पनि मिलापत्र हुन नसकेका उजुरीलाई मात्र कानुनी प्रक्रियाका लागि सम्बन्धित निकायमा पठाउने गरिएको बताए ।
उनका अनुसार घरेलु हिंसासम्बन्धी उजुरीमा घरपरिवारभित्र हुने विवाद, झैझगडा तथा अन्य किसिमका हिंसाका घटना आउने गरेका छन् । उजुरीको प्रकृति र पीडितको अवस्थाका आधारमा मिलापत्रको प्रक्रिया अघि बढाउने वा कानुनी प्रक्रियाका लागि सम्बन्धित निकायमा पठाउने गरिएको उनले बताए ।
प्रहरीका अनुसार साउनमा घरेलु हिंसासम्बन्धी ६३ वटा उजुरी परेका थिए । तीमध्ये ६१ वटा मिलापत्रबाट टुंग्याइएको थियो । त्यस्तै, भदौमा ४५ वटा उजुरी परेकामा ४३ वटा मिलापत्रबाट समाधान गरिएको प्रहरीले जनाएको छ ।
बाँकी उजुरीलाई आवश्यक प्रक्रियाका लागि सम्बन्धित निकायमा पठाइएको प्रहरीको भनाइ छ ।
लुम्बिनीमा २६१ उजुरी
लुम्बिनी प्रदेशका १२ जिल्लामा भदौ महिनामा घरेलु हिंसासम्बन्धी २६१ वटा उजुरी परेको प्रदेश प्रहरीको तथ्यांकले देखाएको छ ।
प्रदेश प्रहरीका अनुसार तीमध्ये कुटपिटसम्बन्धी १६१, गालीगलौज तथा झैझगडासम्बन्धी ९७ र आर्थिक हिंसासम्बन्धी तीनवटा उजुरी रहेका छन् ।
भदौमा परेका घरेलु हिंसाका उजुरीमध्ये ११६ वटा मिलापत्रबाट टुंग्याइएको प्रदेश प्रहरीले जनाएको छ । त्यस्तै, २३ वटा उजुरी अदालत पठाइएको र २२ वटा उजुरी प्रक्रियामा रहेको प्रहरीको तथ्यांकमा उल्लेख छ ।
घरेलु हिंसासम्बन्धी उजुरीमा पीडितको अवस्था, घटनाको प्रकृति र कानुनी व्यवस्थाअनुसार आवश्यक प्रक्रिया अघि बढाउने गरिएको प्रदेश प्रहरीले जनाएको छ ।
Discussion about this post