खोजखबर संवाददाता
बाँके साउन १४ । नेपालगञ्ज उपमहानगरपालिकाका कार्यबाहक प्रमुख जुम्मन खाँले मंगलबार सामुदायिक विद्यालय र मदरसाको अनूगमन गर्नुभएको छ ।
वडा नम्बर ७, वडा नम्बर १४ र वडा नम्बर १६ मा रहेका तीनवटा सामुदायिक विद्यालय र एउटा मदरसाको आकस्मिक अनूगमन गर्नुभएका कार्यबाहक मेयर खाँले विद्यालयमा विद्यार्थीको उपस्थिती न्यूनसंख्यामा हुनु डरलाग्दो भएको बताउनुभयो । एउटा कक्षामा ४९ जना विद्यार्थी भर्ना भएको अवस्थामा ११ जना मात्रै विद्यार्थी कक्षामा उपस्थित भएको पाइयो, कार्यवाहक प्रमुख खाँले भन्नुभयो,– सामुदायिक विद्यालय र मदरसामा गुणस्तरीय शिक्षाका लागि सरोकारवाला निकायसँगै अभिभावकको पनि ध्यान पुग्न आवश्यक देखिएको छ ।
कार्यबाहक प्रमुख खाँले नेपालगञ्जमा निर्माण सम्पन्न हुने अवस्थामा पुगेका बसपार्क र ल्याण्डफिलसाईटको कामको बारेमा समेत स्थलगत अनूगमन गरि जानकारी लिनुभएको छ । यसैबीच नेपालगञ्ज उपमहानगरपालिका कार्यपालिका बोर्डले नवनियुक्त कानूनी सल्लाहकार लोकबहादुर शाह र प्रेस सल्लाहकार गोविन्द शर्मासँग मंगलबार परिचयात्मक कार्यक्रम गरेको छ । सो अवसरमा कार्यबाहक प्रमुख खाँ, प्रमुख प्रशासकीय अधिकृत हरी प्याकुरेल, प्रबक्ता प्रमोद रिजाल, वडा अध्यक्ष तथा कार्यपालिका सदस्यहरुले आपसी सहकार्य र समन्वयमा उपमहानगरपालिकामा काम गर्न सुझाव दिनुभयो । अनूगमनमा कार्यबाहक प्रमुख जुम्मन खाँ को ब्यस्तता
Discussion about this post