एजेन्सी
काठमाडौ २२ गते ।
भारतीय सेनाले भारत-चीनको विवादित सीमा क्षेत्रबाट चिनियाँ जनमुक्ति सेनाले आफ्ना पाँच जना मानिसहरूलाई अपहरण गरेको आरोपमा चीनलाई सचेत तुल्याएको एक मन्त्रीले आइतबार बताएका छन्। आणविक शक्तिसम्पन्न यी दुई छिमेकी राष्ट्रबीच पछिल्ला केही महिनायता तनाव चलिरहेको छ।
जुन १५ मा लद्दाखको सीमामा दुबै देशका सेनाबिच हिंसात्मक झडप हुँदा २० भारतीय सैनिक मारिएपछि दुबै देशको सम्बन्ध बिग्रिएको छ। भारतका अल्पसंख्यक मामिला राज्य मन्त्री किरेन रिजिजूले अपहरणलाई लिएर सीमा तनाव कम गर्नका लागि स्थापना गरिएको सेनाको हटलाइन सक्रिय गरिएको बताएका छन्। उनी अरुणाचल प्रदेशका सांसद पनि हुन्।
‘अरूणाचल प्रदेशको सीमामा रहेको पिएलए समकक्षीलाई भारतीय सेनाले हटलाइन सन्देश पठाइसकेको छ। प्रतिक्रियाको पर्खाइमा छौं’, उनले ट्विटमा भने। उत्तरपूर्वी राज्यको प्रहरीले स्थानीय संचारमाध्यमलाई अपहरितका आफन्तले फेसबुकमा उनीहरू पिएलएबाट अपहरणमा परेको भनेर गरेको दाबीमाथि अनुसन्धान भइरहेको जनाएको छ। शनिबार द अरूणाचल टाइम्सले शिकार गरिरहेका अवस्थामा उनीहरूको अपहरण भएको समाचार प्रकाशित गरेको थियो।
उनीहरू कतिबेलादेखि बेपत्ता भए भन्ने बारेमा केही स्पष्ट हुन सकेको छैन। भारतका रक्षामन्त्री राजनाथ सिंह तथा उनका चिनियाँ समकक्षी जनरल वेई फेङबीच मस्कोमा भेटवार्ता भएका समयमा यो घटना सार्वजनिक भएको हो।
Discussion about this post