नयाँदिल्ली, भदौ २६ गते ।
ब्रिक्स शिखर सम्मेलनका लागि नयाँदिल्लीमा कडा सुरक्षा व्यवस्था गरिएपछि सर्वसाधारणको दैनिक आवागमन प्रभावित भएको छ।
प्रमुख सडकमा ब्यारिकेड र जाँचस्थल राखिएका छन् भने विभिन्न क्षेत्रमा ट्राफिक प्रतिबन्ध लगाइएको छ। ठूलो संख्यामा सुरक्षाकर्मी परिचालन गरिएको छ। आवागमन सहज बनाउन सरकारले सार्वजनिक बिदासमेत दिएको छ।
सडक बन्द र मार्ग परिवर्तनका कारण छोटो दूरीको यात्रा पनि लामो बन्न थालेको स्थानीयले बताएका छन्। अटोरिक्सा चालक नीरज कुमारले प्रतिबन्धको सबैभन्दा ठूलो असर न्यून आय भएका मानिसलाई परेको बताए। ‘एक किलोमिटरको यात्रा आठ किलोमिटरको चक्करमा परिणत भयो भने हामीले के गर्ने ?’ उनले भने।
डेलिभरी चालक मोहम्मद एलियासले काममा पुग्नै कठिन भएको बताए। ‘काममा पुग्दा पनि ट्राफिकमा फस्ने अवस्था छ,’ उनले भने।
सम्मेलनमा रुसी राष्ट्रपति भ्लादिमिर पुटिन, चिनियाँ राष्ट्रपति सी जिनपिङ र इरानी राष्ट्रपति मसुद पेजेस्कियानलगायत नेता सहभागी हुने अपेक्षा गरिएको छ। ब्रिक्समा अहिले ११ देश सदस्य छन्।
Discussion about this post