बाँके, भदौ २८ गते ।
भारतको रुपैडिहा प्रहरीले लागूऔषधसम्बन्धी मुद्दामा फरार रहेका पत्रकार बताउने रामजी सोनीलाई पक्राउ गरेको छ।
रुपैडिहा थाना क्षेत्रको स्टेशन रोड निवासी ३५ वर्षीय सोनीलाई आइतबार गोप्य सूचनाका आधारमा रुपैडिहा बजारस्थित रामदूत क्लाथ स्टोरनजिकबाट पक्राउ गरिएको प्रहरीले जनाएको छ। उनी रुपैडिहाबाट ‘सुदर्शन न्युज’का रिपोर्टरका रूपमा काम गर्दै आएका थिए।
प्रहरीका अनुसार गत सेप्टेम्बर ६ मा रुपैडिहा प्रहरी र सशस्त्र सीमा बल (एसएसबी)को संयुक्त टोलीले दशहरा बाग क्षेत्रमा लागूऔषधविरुद्ध कारबाही गरेको थियो। त्यस क्रममा शकीला बीबीलाई ११६ ग्राम स्म्याकसहित पक्राउ गरिएको थियो।
उक्त घटनामा रुपैडिहा थानामा मुद्दा नम्बर २३७/२०२६ अन्तर्गत एनडीपीएस ऐनको धारा ८/२१ बमोजिम मुद्दा दर्ता भएको थियो। सोही घटनामा संलग्न रहेको आरोपमा फरार रहेका सोनीलाई पक्राउ गरिएको प्रहरीले जनाएको छ।
प्रहरीका अनुसार सोनीविरुद्ध यसअघि पनि विभिन्न आपराधिक मुद्दा दर्ता भएका छन्। सन् २०२१ मा भारतीय दण्ड संहिताका विभिन्न धाराअन्तर्गत दुईवटा मुद्दा दर्ता भएको र सन् २०२२ मा धारा ३२३, ५०४ र ५०६ अन्तर्गत अर्को मुद्दा दर्ता भएको प्रहरी अभिलेखमा उल्लेख छ।
सोनीमाथि लागूऔषध कारोबारीसँग बार्गेनिङ गरेको तथा समाचार प्रकाशन गरिदिने भन्दै रकम मागेको आरोपसमेत रहेको बताइएको छ । यी आरोपबारे थप अनुसन्धान भइरहेको प्रहरीको भनाइ छ।
पक्राउ परेका सोनीलाई आवश्यक कानुनी प्रक्रिया पूरा गरी बहराइचस्थित अदालतमा पेश गर्न पठाइएको प्रहरीले जनाएको छ। प्रहरी विवरणअनुसार उनीविरुद्ध आईपीसीका धारा ४१८, ४२४, ४२६, ३२३, ५०४ र ५०६ लगायतका मुद्दाका साथै एनडीपीएस ऐनअन्तर्गतको मुद्दा रहेको छ।
पक्राउ अभियान रुपैडिहा थानाका प्रहरी निरीक्षक हरेन्द्र कुमार मिश्रको नेतृत्वमा सञ्चालन भएको थियो। टोलीमा उपनिरीक्षक भीम सिंह, दिलीप कुमार र नरेन्द्र गुप्तासहित प्रहरी जवान विपिन गौड र गणेश पाण्डेय सहभागी थिए।
Discussion about this post