बाँके मंसिर १३ गते ।
स्थानीय प्रशासनको लापरवाही र गैरजिम्मेवारीका कारण नेपालगन्जको जमुनाह नाकामा नागरिकहरुले सास्ती खेप्न बाध्य भएका छन् । लकडाउनका कारण सीमानाका बन्द हुँदा महत्वपूर्ण कामका लागि भारत आउजाउ गर्ने नागरिकहरुले सास्ती खेप्नु परेको हो ।
पहुँच भएकाहरु सजिलैसँग नाकाबाट आउने जाने गरेपनि पहुँच नभएका नागरिकहरुले भने नाकामा अलपत्र पर्ने गरेका छन् । कोरोना भाइरस महामारीका कारण सरकारले नाका अझै खोलेको छैन् । तर स्थानीय प्रशासनको समन्वय र सहकार्यमा गृहमन्त्रालयले ठाउँठाउँका नाकाहरु खोल्न थालेको छ ।
रौतहटको गौर बैरगनिया सीमा नाका गृहमन्त्रालयको समन्वयमा स्थानीय प्रशासनले खोलिसकेको छ । नेपालीहरुलाई पैदल अबाजत–जाबत दिन रौतहटको एक मात्र गौर बैरगनिया नाका बिहीबारबाट खोलिएको थियो । तर नेपालगन्जको जमुनाह नाका खोल्नेबारे भने प्रशासन मौन छ । नेपालीलाई पैदल, अत्यावश्यक विवाहको गाडी, गम्भीर बिरामी बोकेको एम्बुलेन्स तथा सवारीसाधन, शव बाहनलाई अभिलेख राखेर आउन–जान दिने गरी नाका खोल्न स्थानीयहरुले माग गर्दै आएका छन् ।
कोरोनाको कारण आठमहिनादेखि बन्द सीमानाका पैदल आवत जावत तथा अत्यावश्यक सवारीसाधनका लागि पनि नखोल्दा स्थानीय सर्वसधारण समस्यामा छन् । लामोसमयदेखि नेपाल भारत सीमा नाका बन्द भएपछि यसैको फाइदा उठाएर नाकाको सुरक्षार्थ खटिएको सशस्त्र प्रहरीले अवैध असुली गर्दै आइरहेको छ ।
सशस्त्रले मुख्य नाका छलेर नेपाल प्रवेश गर्ने र भारत जानेहरुबाट रकम असुल्ने गरेको छ । त्यसको तथ्य अनलाइन खोजखवरसँग सुरक्षित छ । सिके राउत नेतृत्वको जनमत पार्टीका केन्द्रिय सदस्य तथा बाँके जिल्लाका इन्चार्ज इरफान शेषले तत्काल नाका खोल्न माग गर्नुभयो । पहुँचका भरमा ठूलाबडाहरु आउजाउ गर्न पाउने तर निम्न आयस्तर भएका नागरिकहरुलाई पनि सीमामा रोक्ने कार्य गलत भएको भन्दै उहाँले तत्काल नाका खोल्न माग गर्नुभएको हो ।
जनमतले यसअघि नाका खोल्न माग गर्दै जमुनाहमा प्रर्दशन पनि गरेको थियो । सिडियो रामबहादुर कुरुम्वांगले गृहमन्त्रालयसँग समन्वय गर्न नसक्दा नाकामा नेपालीले दुख पाइरहेका छन् ।
Discussion about this post