बाँके, असार १५ गते ।
आज असार १५ अर्थात् राष्ट्रिय धान दिवस तथा दही–चिउरा खाने पर्व। ‘मुरी फलाउने, मानो रोप्ने’ दिनका रूपमा मनाइने यस अवसरमा देशभरका किसान धान रोपाइँमा व्यस्त छन्। केही सातादेखि पर्याप्त वर्षा नहुँदा रोपाइँ प्रभावित हुने चिन्तामा रहेका किसानलाई आइतबार बिहानदेखि परेको वर्षाले राहत दिएको छ।
लुम्बिनी प्रदेश कृषि विकास निर्देशनालयका अनुसार प्रदेशका १२ जिल्लामा धान खेती हुने कुल तीन लाख एक हजार ३७२ हेक्टर क्षेत्रफलमध्ये हालसम्म ६२ हजार ६७० दशमलव ८७ हेक्टरमा मात्र रोपाइँ सम्पन्न भएको छ। कृषि प्रचार अधिकृत नवीन गैरेका अनुसार यो कुल क्षेत्रफलको २० दशमलव ८ प्रतिशत हो। गत वर्षको यही अवधिको तुलनामा यो करिब चार प्रतिशतले कम रहेको निर्देशनालयले जनाएको छ।
जिल्लागत विवरणअनुसार पाल्पामा सबैभन्दा बढी ४५ प्रतिशत धान रोपाइँ सम्पन्न भएको छ। त्यहाँ सात हजार २८७ हेक्टरमध्ये तीन हजार २७९ दशमलव ४ हेक्टरमा रोपाइँ सकिएको छ। त्यसपछि रुपन्देहीमा ४३ प्रतिशत, गुल्मीमा २५ दशमलव ७७ प्रतिशत, रुकुम (पूर्व) मा २५ प्रतिशत, नवलपरासी (बर्दघाट–सुस्तापूर्व) मा २४ दशमलव ५ प्रतिशत तथा बर्दियामा १९ दशमलव ३१ प्रतिशत रोपाइँ सम्पन्न भएको छ।
दाङमा ३६ हजार २०० हेक्टरमध्ये पाँच हजार ४३० हेक्टर अर्थात् १५ प्रतिशत क्षेत्रमा रोपाइँ सकिएको छ। कपिलवस्तुमा १५ दशमलव ८ प्रतिशत, अर्घाखाँचीमा ११ दशमलव २७ प्रतिशत, प्यूठानमा आठ प्रतिशत तथा रोल्पामा चार दशमलव आठ प्रतिशत रोपाइँ भएको निर्देशनालयको तथ्याङ्कमा उल्लेख छ।
प्रदेशको प्रमुख धान उत्पादन क्षेत्र मानिने बर्दियामा ५० हजार १५० हेक्टरमा धान खेती हुने गरेकामा हालसम्म नौ हजार ६८५ हेक्टर अर्थात् १९ दशमलव ३१ प्रतिशत क्षेत्रमा रोपाइँ सम्पन्न भएको छ।
यता, सबैभन्दा कम धान रोपाइँ बाँके जिल्लामा भएको छ। जिल्लाको ३३ हजार ७८० हेक्टर धानखेतीयोग्य क्षेत्रमध्ये हालसम्म केवल १६८ दशमलव ९ हेक्टर अर्थात् शून्य दशमलव पाँच प्रतिशत क्षेत्रमा मात्र रोपाइँ सम्पन्न भएको निर्देशनालयले जनाएको छ।
मनसुन सक्रिय बन्दै गएसँगै आगामी केही दिनमा धान रोपाइँले तीव्रता लिने र अधिकांश जिल्लामा रोपाइँको दर उल्लेख्य रूपमा बढ्ने अपेक्षा गरिएको कृषि विकास निर्देशनालयले जनाएको छ।
Discussion about this post