बाँके, असार १४ ।
संस्कृति, पर्यटन तथा नागरिक उड्डयनमन्त्री खड्कराज पौडेलले नेपालको पर्यटन क्षेत्रको दिगो विकासका लागि नेपाल पर्यटन बोर्डको पुनर्संरचना आवश्यक रहेको बताएका छन्।
नेपालगन्ज विमानस्थलको अनुगमनका क्रममा शनिबार साँझ नेपालगन्ज पुगेका मन्त्री पौडेलले बाँकेका होटल तथा पर्यटन व्यवसायीसँग आयोजित अन्तरक्रिया कार्यक्रममा पर्यटन क्षेत्रलाई समयानुकूल, प्रभावकारी र प्रतिस्पर्धी बनाउन पर्यटन बोर्डको पुनर्संरचना अपरिहार्य रहेको बताए।
उनले आगामी आर्थिक वर्षको बजेटमै पर्यटन बोर्डको पुनर्संरचनालाई उच्च प्राथमिकताका साथ समावेश गरिएको जानकारी दिँदै सरकार पर्यटन क्षेत्रको विकास र विस्तारमा प्रतिबद्ध रहेको स्पष्ट पारे।
पर्यटन व्यवसायीका सुझाव सुनेपछि मन्त्री पौडेलले नेपालगन्जलाई अन्तर्राष्ट्रिय पर्यटक भित्र्याउने महत्त्वपूर्ण प्रवेशद्वारका रूपमा विकास गर्न सकिने उल्लेख गरे। उनले व्यवसायीका अधिकांश जायज मागलाई सम्बोधन गर्ने दिशामा सरकार अघि बढिरहेको पनि बताए।
कार्यक्रममा होटल एसोसिएसन नेपाल (हान) बाँकेका अध्यक्ष दिवाकर खनाल, वरिष्ठ उपाध्यक्ष केशव न्यौपाने, होटल व्यवसायी सङ्घ बाँके–नेपालगन्जका अध्यक्ष भीमलाल कँडेल, नाट्टा बाँके च्याप्टरका अध्यक्ष डिल्लीराज रेग्मी तथा पर्यटन व्यवसायी देवानन्द अर्याललगायतले पश्चिम नेपालको पर्यटन क्षेत्रका सम्भावना, चुनौती र आवश्यकताबारे मन्त्रीको ध्यानाकर्षण गराएका थिए।
व्यवसायीहरूले नेपालगन्ज–पोखरा हवाई उडान बन्द हुँदा पर्यटन क्षेत्रमा नकारात्मक असर परेको भन्दै उक्त सेवा पुनः सञ्चालन गर्न आग्रह गरे। साथै, विदेशी पर्यटकमाथि लागू गरिएको हवाई भाडादरको विभेद अन्त्य गर्नुपर्ने माग पनि उनीहरूले राखे।
नेपालगन्जमा अत्याधुनिक नयाँ टर्मिनल भवन निर्माण सम्पन्न भइसकेकाले नेपालगन्ज–दिल्ली सिधा हवाई उडान सञ्चालनका लागि आवश्यक पहल गर्न व्यवसायीहरूले मन्त्री पौडेलसँग आग्रह गरेका छन्।
हान बाँकेका अध्यक्ष दिवाकर खनालले मन्त्रीबाट सकारात्मक प्रतिक्रिया प्राप्त भएकाले पर्यटन क्षेत्रका माग सम्बोधन हुनेमा व्यवसायीहरू आशावादी रहेको बताए।
कार्यक्रममा सहभागी व्यवसायीहरूले पश्चिम नेपालको पर्यटन विकास र प्रवद्र्धनलाई उच्च प्राथमिकतामा राख्दै मन्त्रालयले दीर्घकालीन र प्रभावकारी योजना कार्यान्वयन गर्नुपर्ने आवश्यकता समेत औँल्याएका थिए।
Discussion about this post