बाँके, असार ९ गते ।
बाँकेको नरैनापुर गाउँपालिकालाई पूर्णखोप सुनिश्चितता तथा दिगोपना पालिका घोषणा गरिएको छ। राष्ट्रिय खोप कार्यक्रमअन्तर्गत लक्षित सबै बालबालिकालाई नियमित खोप सेवाको पहुँचमा ल्याउन सफल भएपछि गाउँपालिकालाई औपचारिक रूपमा पूर्णखोप सुनिश्चितता तथा दिगोपना पालिका घोषणा गरिएको हो।
गाउँपालिकाका स्वास्थ्य शाखा प्रमुख नगेन्द्रकुमार शाहका अनुसार पूर्णखोप सुनिश्चितता तथा दिगोपना घोषणा निर्देशिकाअनुसार आवश्यक सम्पूर्ण प्रक्रिया पूरा गरी पालिकाका सबै ६ वटै वडामा घरदैलो सर्वेक्षण सञ्चालन गरिएको थियो।
सर्वेक्षणका क्रममा १६ देखि २३ महिनासम्म उमेर समूहका ९०२ जना बालबालिका पहिचान भएका थिए। तीमध्ये ६७६ जनाले नियमित खोप प्राप्त गरिसकेका थिए भने खोप सेवाबाट छुटेका २२६ जना बालबालिकालाई समेत खोपको पहुँचमा ल्याइएपछि गाउँपालिकाले पूर्णखोप सुनिश्चितताको मापदण्ड पूरा गरेको स्वास्थ्य शाखा प्रमुख शाहले जानकारी दिए।
घोषणा समारोहमा जिल्ला समन्वय समिति बाँकेका अध्यक्ष ज्ञानेन्द्र चौधरीले गाउँपालिका अध्यक्ष इश्तियाक अहमद शाहलाई पूर्णखोप सुनिश्चितता तथा दिगोपना पालिकाको प्रमाणपत्र हस्तान्तरण गरेका थिए। त्यसपछि अध्यक्ष शाहले पालिकाभित्रका स्वास्थ्य संस्था प्रमुखहरूलाई प्रमाणपत्र वितरण गरे।
कार्यक्रममा पूर्णखोप अभियानलाई सफल बनाउन योगदान पु¥याउने १२ जना खोप कार्यकर्तालाई सम्मान गरिएको थियो। साथै स्वास्थ्य सेवाबाट अवकाश प्राप्त गरेका तीन जनालाई बिदाइसमेत गरिएको थियो।
सो अवसरमा बोल्दै जिल्ला समन्वय समिति बाँकेका अध्यक्ष चौधरी, गाउँपालिका अध्यक्ष शाह तथा प्रमुख प्रशासकीय अधिकृत नवराज वलीले पूर्णखोप सुनिश्चितता घोषणा प्रशासनिक उपलब्धिमा मात्र सीमित नभई बालबालिकाको स्वास्थ्य सुरक्षाप्रति पालिकाको दृढ प्रतिबद्धताको प्रतीक भएको बताए। उनीहरूले स्वास्थ्यकर्मी, जनप्रतिनिधि, महिला स्वास्थ्य स्वयंसेविका, अभिभावक तथा सरोकारवालाहरूको सामूहिक प्रयासबाट यो सफलता सम्भव भएको उल्लेख गरे।
कार्यक्रममा जिल्ला समन्वय समिति उपप्रमुख सीता कार्की, गाउँपालिका उपाध्यक्ष जयन्ती श्रीवास्तव, वडा नं. १ का अध्यक्ष इसाक जोलाहा, वडा नं. ६ का अध्यक्ष प्रेम मौर्य, प्रशासकीय अधिकृत भरत महतो, स्वास्थ्य शाखाका सहसंयोजक करम चौधरी, स्वास्थ्यकर्मीलगायत विभिन्न सरोकारवालाहरूको सहभागिता रहेको थियो।
Discussion about this post