बाँके कार्तिक ९ गते ।
लर्ड बुद्ध एजुकेसनल एकेडेमी नेपालगन्ज मेडिकल कलेज शिक्षण अस्पताल प्रशासनले कर्मचारीको माग सम्वोधन गर्न वेवास्ता गरेको छ ।
कर्मचारीले इमरजेन्सीबाहेकको सम्पूर्ण सेवा ठप्प पारेको ८ दिन वितिसक्दा समेत माग सुनुवाई सम्वोधनमा अस्पताल प्रशासन गम्भीर नभएको हो ।
श्रम, रोजगार तथा सामाजिक सुरक्षा मन्त्रालयले २२ दिनअघि गत १८ असोज मा उपसचिव भोलानाथ गुरागाईं संयोजनमा ३ सदस्यीय मध्यस्थ समिति गठन गरेको छ।
तर, उक्त समितिले कुनै काम गरेको छैन। संयोजक गुरागाईं अस्पताल व्यवस्थापन र कर्मचारी ट्रेड युनियनले मध्यस्थ समितिका लागि सदस्य नपठाएका कारण काम नभएको बताएका छन्।
कर्मचारी संघका उपसभापति साहाबुद्धिन खानले माग सम्वोधन नभएसम्म आन्दोलन जारी राख्ने बताउनुभयो । अस्पताल प्रशासनले भने कोरोना महामारीका कारण अस्पताल घाटामा चलिरहेकाले माग सम्वोधन गर्न नसकिने बताउँदै आएको छ ।
तर उपसभापति खानले भने अस्पताल घाटामा संचालन नभएको बताउनुभयो । ‘अस्पताल घाटामा संचालन भएको छैन बरु घाटा देखाइएको हो । हाम्रो माग नेपाल सरकारले तोके अनुसारको तलवभत्ता पाउनु भन्ने रहेको छ ।’
उहाँले विगतका सहमति समेत अस्पताल प्रशासनले कार्यान्वयन नगरेको बताउनुभयो । बाँकेका प्रमुख जिल्ला अधिकारी सूर्यबहादुर खत्रीले आइतबार शिक्षण अस्पतालमा आन्दोलनरत कर्मचारीहरूलाई मन्त्रालयले समिति गठन गरिसकेकाले आन्दोलन स्थगित गर्न आग्रह गर्नुभएको थियो ।
तर, मन्त्रालयको मध्यस्थ समितिले आन्दोलन स्थलमै आएर औपचारिक जानकारी नगराएसम्म आन्दोलनकारीहरूले तालाबन्दी नखोल्ने र आन्दोलन स्थगित नगर्ने बताएका छन्।
लर्ड बुद्ध एजुकेसनल एकेडेमी नेपालगन्ज मेडिकल कलेज शिक्षण अस्पतालका कर्मचारीहरू नेपालगन्ज शिक्षण अस्पताल नेपालगन्ज, कोहलपुर र चिसापानीमा गरी झन्डै ११ सय कर्मचारी ७ बुँदे साझा मागसहित आन्दोलन गरिरहेका छन्।
५ वर्षदेखि रोकिएको तलब–भत्ता वृद्धि, दरबन्दी सिर्जना, पदपूर्ति र बढुवा गर्नुपर्ने, सामाजिक सुरक्षा कोष, उपदान, बिमा र शेयर उपलब्ध गराउनुपर्ने, स्वास्थ्य उपचार खर्च एवं सेवा सुविधा वृद्धि हुनुपर्ने, हाजिर र बिदा थप व्यवस्थित हुनुपर्नेलगायत उनीहरूको माग छ।
Discussion about this post