बाँके, भदौ ५ गते ।
नेपालगन्ज उद्योग वाणिज्य संघको निर्वाचनमा मतदान गर्न आउने मतदाताले फोटोसहितको परिचयपत्र अनिवार्य रूपमा ल्याउनुपर्ने भएको छ।
संघले शुक्रबार सूचना जारी गर्दै शनिबार हुने निर्वाचनमा मतदान गर्न आउँदा मान्य परिचयपत्र साथमा ल्याउन भनेको हो। परिचयपत्र नल्याए मतदान गर्न नदिइने संघले जनाएको छ।
मतदानका लागि नागरिकता, सरकारी मतदाता परिचयपत्र, राष्ट्रिय परिचयपत्र, वाणिज्य, घरेलु वा सम्बन्धित पालिकामा दर्ता भएको फोटोसहितको प्रमाणपत्रमध्ये कुनै एक देखाउनुपर्नेछ।
यस्तै, आन्तरिक राजस्व कार्यालयबाट जारी भएको स्थायी लेखा नम्बर (पान) को प्रमाणपत्र वा नेपालगन्ज उद्योग वाणिज्य संघले जारी गरेको फोटोसहितको सदस्यता प्रमाणपत्रका आधारमा पनि मतदान गर्न पाइने संघले जनाएको छ।
संघका महासचिव भीमबहादुर रानाभाटले जारी गरेको सूचनामा मतदातालाई परिचय खुल्ने फोटोसहितको प्रमाणपत्र लिएर मात्र मतदानस्थलमा आउन आग्रह गरिएको छ। संघको निर्वाचन भोलि शनिबार हुँदैछ।
Discussion about this post