बर्दिया चैत १६ गते ।
बर्दियामा एक सातायता दुईवटा बाघ आपसमा लडेर मरेका छन् । दुईवटै बाघ बर्दिया राष्ट्रिय निकुञ्जबाहिर सामुदायिक वनभित्र लडेर मरेका हुन् । मरेका बाघको मुख, पेटमा पन्जाले हिर्काएका खत भेटिएका छन् ।
आन्द्रासमेत क्षतविच्छत भएको छ । निकुञ्ज नजिकको सामुदायिक वनमा बस्दै आएको बाघ र अन्यत्रबाट आएको नयाँ बाघबीच भिडन्त भएको हुन सक्ने अनुमान छ ।
निकुञ्जका पूर्वप्रमुख संरक्षण अधिकृत रमेशकुमार थापाले स्थायी रूपमा बस्दै आएको बाघले नयाँ बाघ देख्नासाथ आक्रमण गर्ने गरेको बताउँनुहुन्छ । ‘बूढो वा कमजोर भएको बाघ आक्रमणमा मारिने गर्छ,’ उहाँले भन्नुभयो । निकुञ्ज र आसपासका सामुदायिक वनमा बाघको संख्या बढ्दै गएको छ ।
बढ्दै गएका बाघ नयाँ ठाउँ खोज्दै विभिन्न सामुदायिक वनमा प्रवेश गर्न थालेका छन् । बाघ विशेषज्ञ एवं राष्ट्रिय प्रकृति संरक्षण कोष कार्यक्रम व्यवस्थापनका प्रमुख डा. चिरञ्जीवी पोखरेलले बाघले आफ्नो क्षेत्रमा अरु बाघलाई प्रवेश गर्न नदिने र पसेको पाएमा आक्रमण गर्ने बताउनुभयो । ‘बासस्थान साँघुरो र आहाराका कारण पनि यस्तो समस्या आएको आँकलन गरिएकोे छ ।
Discussion about this post