दाङ भदौ ८ गते ।
करिब चार महिनादेखि बन्द भएको टरिगाउँ एयरपोर्टबाट पुनः उडान सुरु भएको छ । कहिले यात्रु अभाव त कहिले जहाज अनियमित हुँदा बन्द भएको एयरपोर्टबाट पुनः सातामा तीन दिन उडान सुरु भएको हो ।
अनियमित भएको नेपाल वायुसेवा निगमले सेवालाई पुनः निरन्तरता दिएको हो । पर्याप्त यात्रुहरू नहुँदा नियमित उडान भर्न नसकेको भन्दै सेवा प्रभावित हुनेगरेको छ । चार महिनाअघिसम्म नियमित नेपाल वायु सेवा निगमको १९ सिटे टुइनेटर हप्तामा ४ दिन तुलसीपुरमा उडान भर्नेगरेको थियो ।
अहिले टरिगाउँ एयरपोर्टबाट आइतबार, बुधबार र शुक्रबार गरी हप्तामा तीन दिन मात्रै उडान हुने गरे पनि मौसम तथा अन्य कारणले कहिलेकाहीँ समस्या हुनेगरेको नागरिक उड्डयन कार्यालय तुलसीपुरका प्रमुख चेतराज भट्टले जानकारी दिनुभयो । उहाँका अनुसार यात्रु भएको अवस्थामा हप्तामा ३ दिन उडान हुनेगरेको छ ।
भट्टले यात्रुहरूको अभाव र महँगो भाडादरका कारण नियमित उडानमा समस्या भएको बताउनुभयो । उहाँले भन्नुभयो, ‘यहाँबाट काठमाडौँ जानलाई भाडा महँगो छ, जस्लेगर्दा यात्रुहरू पाउन समस्या रहेको छ । यात्रु नहुँदा विमान नियमित नहुने समस्या छ ।’ तर सरोकारवाला निकायले नियमित विमान चल्न नसक्दा टरिगाउँ एयरपोर्टमा यात्रुको समस्या हुनेगरेको तुलसीपुर उद्योग वाणिज्य सङ्घका अध्यक्ष रामप्रसाद चालिसेले बताउनुभयो ।
जिल्लाबाट नियमित उडान नहुँदा यात्रुहरू भैरहवा तथा नेपालगञ्ज पुगेर काठमाडौँ जानुपर्ने बाध्यता रहेको उहाँको भनाइ छ । उहाँले भन्नुभयो, ‘नियमित उडान हुन सके विमान चल्नलाई समस्या हुँदैन । तर विमान नियमित नहुँदा यहीबाट जाने मानिसहरू पनि नेपालगञ्ज वा भैरहवा जानुपर्ने बाध्यता छ ।’
विमान कम्पनीले अन्य स्थानमा बढी भाडा हुने भएकाले यहाँ हुने उडान कटाउने गरेको उहाँको भनाइ छ । हाल तुलसीपुरदेखि काठमाडौँका लागि आठ हजारदेखिमाथि भाडा रहेको छ । भाडा महँगो र उडान पनि सुनिश्चित नभएका कारण यात्रुहरू यहाँबाट जहाज चढ्न हिच्किचाउनेगरेको उहाँले बताउनुभयो ।
उहाँले भन्नुभयो, ‘यहाँको फ्लाइट हुने नहुने सुनिश्चित हुँदैन, अन्य स्थानमा एउटा नभए अर्को हुन्छ, त्यही भएर मानिसहरू नेपालगञ्ज वा भैरहवा जाने गरेका छन् ।’
Discussion about this post