बाँके कात्तिक २२ गते ।
हिन्दु धर्मालम्वीको महान चाड तिहार आउन अव हप्ता दिन बाँकी छ । किनमेलका लागि मानिसहरु गाउँदेखि बजार पुग्छन् । कतिपयले नेपालगन्ज बजारबाटै सामान किनमेल गर्छन् । कतिपय भने सस्तो पाइने आशामा भारतीय बजार रुपैडिया पुग्छन् ।
तर जमुनाह नाकामा खटिएका सशस्त्र प्रहरी, नेपाल प्रहरी र भन्सारका कर्मचारीहरुले नेपालीहरुलाई अनावश्यक दुख दिने गरेका छन् । एक–दुई जोड कपडा ल्याउँदा समेत उनीहरुले केरकार गर्ने र खर्चपानी भन्दै रकम माग्ने गरेका छन् । खर्चपानी नदिनेको सामान बरामद गरेर गायव पार्ने गरेको प्रत्यक्षदर्शी बताउँछन् ।
जमुनाह विओपीबाट मुख्य नाकामा खटिने सशस्त्रले गरिव तथा विपन्न नागरिकलाई अनावश्यक दुख दिने, सामान थुत्ने र अभद्र व्यवहार गर्ने गरेको प्रत्यक्षदर्शीको भनाई छ । मुख्य नाकामा चेकजाँच कडा पारेजस्तो देखाएर अन्य सहायक नाकाबाट सशस्त्र प्रहरीकै सेटिङमा तस्करहरुले ठूलो परिमाणमा अवैध सामानहरु भित्र्याउने गरेका छन् । एकजना प्रत्यक्षदर्शी भन्छन्, ‘नाकामा तस्कर र सशस्त्र प्रहरीका घुमुवा चिन्नै मुश्किल छ । उनीहरुको काम उस्तै–उस्तै छ ।’
यसअघि सशस्त्र प्रहरीको सेटिङमा भित्र्याइएका अवैध सामान नेपालगन्ज लगायतका ठाउँबाट नेपाल प्रहरीले बरामद गर्ने गरेको थियो । त्यतिबेला जिल्ला प्रहरी कार्यालयले घुमुवा प्रहरी परिचालन गरेको थियो । उनीहरुकै सूचनाका आधारमा प्रहरीले भन्सार छलेर ल्याइएको सामान बरामद गर्न सम्भव भएको थियो । तर अहिले जिल्ला प्रहरी कार्यालयले घुमुवा हटाएको छ ।
बाँकेका प्रहरी प्रमुख एसपी सुवासचन्द्र बोहोराले घुमुवा हटाएपछि जिल्लामा अवैध तस्करी मौलाएको हो । एसपी बोहोराको घुमुवा हटाउने निर्णयले सशस्त्र प्रहरी र तस्करलाई फलिफाप भएको छ । जिल्लामा जुवातास मौलाएको छ । साइगाउँ, जयसपुर, खजुरा, नेपालगन्ज बजार क्षेत्र, कोहलपुर लगायतका ठाउँमा व्यापाक जुवातास भइरहेको छ । सीमा क्षेत्रसँग जोडिएका प्रहरी चौकीले परिचालन गरेका घुमुवालाई नहटाउने एसपीको निर्णयले फाइदा पुगेको छ । किनभने उनीहरु आफैले घुमुवा राखेका छन् । आफैले घुमुवा राख्दा चौकी इन्चार्जको असुली धन्दा सुरक्षित बनेको छ ।
Discussion about this post