बाँके मंसिर २४ गते ।
जानकी गाउँपालिकाका स्थानीय जेष्ठ नागरिक राम वहादुर शाहीलाई यो पटक भने सामाजिक सुरक्षा भत्ता लिनका लागि सदरमुकाम नेपालगन्जमा रहेको सांग्रीला बैंकमा जानु परेन् । उनले गाउँपालिकाबाटै सामाजिक सुरक्षा भत्ता बुझे ।
उनीजस्तै अर्का जेष्ठ नागरिक रंगिलाल वर्माले पनि गाउँपालिकाबाटै सामाजिक सुरक्षा भत्ता बुझे । न घण्टौंको लाइन न त आउजाउका लागि लाग्ने यातायात खर्च दुवैको बचत भएपछि वर्मा खुसीले दंग छन् । ‘भत्ता बुझ्नका लागि नेपालगन्ज जानुपथ्र्यो, बूढेसकालको शरीर आउन जानै समस्या थियो वर्माले भने–‘अहिले त नगरपालिका र जनप्रतिनिधिले ज्येष्ठ नागरिकको मनोभावना बुझेर होला पालिकाबाटै भत्ता बुझ्ने व्यवस्था गरेका छन् ।’
बैंकमा घण्टौँसम्म लाइन बसेर वृद्घभत्ता बुझ्दै आएका शाही पनि यस आर्थिक वर्षको भत्ता पालिकाबाटै बुझ्न पाउँदा निकै उत्साहित भएका छन्। उनी भन्छन्, ‘निर्वाचनका बेला भोट माग्न आउँदा वृद्ध भत्तावडाबाट दिन्छौँ भन्थे,त्यतिबेला विश्वास लागेको थिएन,अहिले भने निर्वाचनमा मतदातासँग गरेका प्रतिबद्धता अनुसार नै काम सुरु गरेकोमा निकै खुशी लागेको छ ।’ गाउँपालिकाले सामाजिक सुरक्षा भत्ता पालिकाबाटै वितरण सुरु गरेपछि जेष्ठ तथा अशक्त नागरिकहरुलाई ठूलो राहात मिलेको छ ।
यसअघि सामाजिक सुरक्षा भत्ता लिनका लागि जेष्ठ तथा अशक्त नागरिकहरुलाई नेपालगन्ज बजारमा रहेको मुक्तीनाथ र सांग्रीला बैंकमा जानुपर्ने वाध्यता थियो । गाउँपालिकाबाटै सामाजिक सुरक्षा भत्ता वितरण सुरु भएपछि स्थानियलाई सहज भएको हो । गाउँपालिकाबाट सामाजिक सुरक्षा भत्ता लिन नेपालगन्ज जानुपर्ने वाध्यताका कारण जेष्ठ नागरिकहरुले विभिन्न किसिमका सास्ती झेल्दै आएका थिए । गाउँपालिकाबाटै सामाजिक सुरक्षा भत्ता वितरण सुरु भएपछि विहानैदेखि भोकप्यासै घन्टौसम्म लाईनमा बस्नुपर्ने वाध्यताको अन्त्य भएको जेष्ठ नागरिक हरिदेवी सुनारले बताइन् ।
नेपालगन्ज जाँदा आउँदाको झनझट र भाँडा खर्चको समेत समस्या टरेको भन्दै शेरे विकले खुशी व्यक्त गरे । जेष्ठ तथा अपाङ्गता भएकाहरुको समस्यालाई मध्यनजर गरि सामाजिक सुरक्षा भत्ता वितरण प्रकृयालाई गाउँपालिकाबाटै व्यवस्थापन गरिएको प्रमुख प्रशासकिय अधिकृत दिल वहादुर पौडेलले बताए । एन.आई.सि एसिया बैंक र कुमारी बैंकबाट सामाजिक सुरक्षा भत्ता वितरणको व्यवस्थापन मिलाइएको उनले बताए । जानकी गाउँपालिकामा ६ वटा वडा छन् ।
प्रत्येक वडामा वितरण गर्ने गरी व्यवस्था मिलाइएको पनि उनको भनाइ छ । जनतालाई सकेसम्म सरल र सहजरुपमा सेवा प्रवाह गर्ने उद्देश्यका साथ पालिकाले काम गरिरहेको जानकी गाउँपालिकाका अध्यक्ष छब्बन खाँले बताए । भौगोलिक रुपमा टाढा रहेकाले वृद्धहरुलाई सहज सेवा प्रदान गर्नका लागि पालिकामै सामाजिक सुरक्षा भत्ता उपलब्ध गराइएको पनि उनले बताए । सामाजिक सुरक्षा भत्ता पालिकामै पाउँदा धेरैलाई राहत मिलेको बताउँदै पालिकामा लक्षित वर्गको सामाजिक सुरक्षा भत्ता बैंकमा आएर लाईनमा बसी लिनुपर्ने बाध्यताको अन्त्य भएको पनि उनले बताए ।
‘जेष्ठ तथा अशक्त नागरिकहरुलाई यसैपनि हिड्डुलमा समस्या हुन्छ उनले भने–‘बजार जान लागत खर्च पनि लाग्ने, समयको समेत नोक्सान र झनझट पनि उस्तै खेप्नु पर्ने अवस्था देखिएपछि बैंकहरुसँगको सहकार्यमा पालिकाबाटै सामाजिक सुरक्षा भत्ता वितरणको व्यवस्था मिलाइएको हो ।’
Discussion about this post