बाँके फागुन २७ गते ।
डुडुवा गाउँपालिकामा औलो रोगका विरामी फेला परेका छन् । औलो रोगको सर्वेक्षण गर्दा डुडुवा गाउँपालिका वडा नं. ४ शाहपुर्वा र मोल्हुपुर्वाका महिला र पुरुषमा औलो पुष्टि भएको स्वास्थ्य शाखा प्रमुख हेमन्त शर्माले जानकारी दिए ।
उनले यी दुई गाउँका एक महिला र एक जना पुरुषमा औलो पुष्टि भएको बताए । उनका अनुसार स्थानीय दुई जनामा औलोको लक्षण देखिएको थियो । उनीहरुको रगत (आरडिटी र माइक्रोस्कोपिक) परीक्षण गर्दा औलो रोग पुष्टि भएको शर्माले वताए । ‘सरकारको नीति अनुसार डुडुवाका सर्वसाधारणको औलो जाँच गर्दा दुई जनामा औलोको लक्षण देखियो । उनीहरुको रगत (आरडिटी र माइक्रोस्कोपिक) परीक्षण गर्दा औलो पुष्टि भएको छ,’ उनले भने ।
उनले औलो पुष्टि भएको वडामा घरधुरी सर्भेक्षण सुरु गरेको बताए । तीन जनाका दरले चार वटा समुहमा १२ जना स्वास्थ्यकर्मी परिचालन गरि घरधुरी सर्भेक्षणसँगै स्वास्थ्य शिक्षा, परामर्श र सचेतना अभियान संचालन गरिएको शर्माको भनाई छ । ‘स्थानीयलाई ज्वरो लगायतका सामान्य लक्षण देखिने वित्तिकै नजिकको स्वास्थ्य संस्थामा रगतको नमूना परीक्षण गराउन भनेका छौँ,’ शर्माले भने, ‘पालिकामा रहेका सबै स्वास्थ्य संस्थामा रगत परीक्षण निःशुल्क गर्ने व्यवस्था मिलाएका छौँ ।’
पालिकाले घरधुरी सर्वेक्षण पछि रोगबाट बच्नका लागि निःशुल्क किटनाशक झुल वितरण गर्ने पालिका अध्यक्ष नरेन्द्रकुमार चौधरीले बताए । ‘पालिकाका केही वडामा औलो रोग भेटिएको छ । थाहा पाउनै वित्तिकै स्वास्थ्यकर्मी परिचालन गरि व्यवस्थापन गरिरहेका छौँ । औलो फैलिन नदिन उच्च सर्तकता अपनाएका छौँ,’ अध्यक्ष चौधरीले भने ।
बाँकेको नरैनापुर गाउँपालिकामा औलौका सबैभन्दा बढी विरामी भेटिएका छन् । चालु आर्थिक वर्ष ०८०÷०८१ को साउनदेखि माघसम्म नरैनापुर गाउँपालिकामा ८० जना, डुडुवा, नेपालगन्ज र राप्तीसोनारीमा पाँच–पाँच जना तथा बैजनाथ गाउँपालिकामा एक जनामा औलोका विरामी भेटिएको स्वास्थ्य कार्यालय बाँकेका किटजन्य रोग फोकल पर्सन दुर्गा गौतमले बताइन् ।
उनका अनुसार बाँके जिल्ला औलोको उच्च जोखिममा रहेको छ । औलोका विरामी देखिएका पालिकामा विशेष निगरानी बढाएको उनले बताइन् । रोग नियन्त्रण तथा व्यवस्थापनका लागि नेपाल सरकार, स्वास्थ्य मन्त्रालय इपिडिमियोलोजी तथा रोग नियन्त्रण महाशाखाको सहयोगमा स्वास्थ्य कार्यालय र स्थानीय तहको संयुक्त पहलमा किटनाशक झुल वितरण र सचेतनामुलक कार्यक्रम संचालन गरिएको उनको भनाई छ ।
Discussion about this post