बाँके बैशाख १२ गते ।
सशस्त्र प्रहरी बल लुम्विनी प्रदेशका डिआइजीले परिचालन गरेका सशस्त्र प्रहरीका घुमुवाले बाँकेमा आतंक मच्चाएका छन् ।
सशस्त्र प्रहरीका हवल्दार गुलाम हुसेन अन्सारी डिआइजीले परिचालन गरेका घुमुवा हुन् । उनको घर नेपालगन्ज उपमहानगरपालिका–१६ जयसपुर हो । अन्सारीलाई बाँके हेर्ने जिम्मा छ ।
डिआइजीको पावर देखाउँदै ड्यूटीमा रहेका अधिकृतस्तरका सशस्त्र प्रहरीलाई समेत उनले टेर्दैनन् । डिआइजीको पावर देखाएर उनले बाँकेमा आतंक मच्चाएका छन् ।
उनीसँगै जयसपुर विओपीका वरिष्ठ हवल्दार जमल खाँ पनि तस्कर संग मिलेका छन । जयसपुरस्थित इच्छाराम बाबा मन्दिर नजिकै सशस्त्र प्रहरीका बरिस्ठ हवल्दार जमल खाँ र घुमुवा अन्सारीको संरक्षणमा तस्करी हुने गरेको प्रत्यक्षदर्शी बताउँछन् ।
अन्सारी र खाँले तस्करसँग लाइन मिलाउने र लाइन लिएका तस्करको सामान सुरक्षितसाथ नेपालगन्ज पुर्याउन सहयोग गर्दै आएका छन् । घुमुवा अन्सारी र खाँसँग मिलेका छन् जयसपुरका कुख्यात तस्कर भौकी ।
सशस्त्र प्रहरीसँग मिलेर भौकीले मिनि ट्रकको अवैध सामान नेपालगन्ज ल्याउने र भारत लैजाने गरेको प्रत्यक्षदर्शी बताउँछन् । अन्सारी तस्कर नाइके भौकीका नातेदार हुन् ।
पछिल्लो समय सशस्त्र प्रहरीको मिलोमतोमा तस्करले भित्र्याएका अवैध सामान बाँके प्रहरीले धमाधम बरामद गर्दै आएको छ । नेपाल प्रहरीले बरामद गरेका अधिकांश सामान भौकीको भएको खुलासा भएको छ । स्रोतका अनुसार एक महिनाको अवधिमा भौकीको ५० लाख रुपैयाँ बराबरको अवैध सामान नेपाल प्रहरीले नेपालगन्जबाट बरामद गरेको छ ।
नेपाल प्रहरीले अवैध सामान धमाधम बरामद गर्न थालेपछि सशस्त्र प्रहरी र तस्करका नाइकेहरु तिरमिराएका छन् ।
एकपछि अर्को सामान बरामद गर्न थालेदेखि तस्करहरुले तस्करीको स्वरुप परिवर्तन गर्न थालेका छन् ।
तर, नाकामा सशस्त्र प्रहरीमात्र खटिदैन । नेपालगन्ज नाकामात्र नेपाल प्रहरीका पनि तीन वटा कार्यालय छन् । इलाका प्रहरी कार्यालय जमुनाह मुख्य नाकामा छ भने भन्सारमा अर्को कार्यालय छ । त्यस लगत्तै इलाका प्रहरी कार्यालय जयसपुर छ ।
नेपाल प्रहरीको जस्तै सशस्त्र प्रहरीले पनि जमुनाह, भन्सार र चौलिकामा चेकजाँच गर्छ । सशस्त्र प्रहरी र नेपाल प्रहरीले ब्यारियल लगाएर सामान चेकजाँच गरे पनि तस्करहरुले अवैध रुपमा सामान ल्याउन कसरी सम्भव भएको छ ? सर्वसाधारणले प्रश्न उठाउन थालेका छन् । ‘मुख्य नाकामा कडाई गरेको देखाउने र सहायक नाकाबाट सामान तस्करी गराएको देखिन्छ,’ स्थानीयले अनलाइन खोजखबरसँग भने ।
गृह मन्त्री रवि लामिछानेले घुमुवा प्रहरी नराख्न निर्देशन दिए पनि सशस्त्र प्रहरीका डिआइजीले घुमुवा हटाएका छैनन् । नाकाको बारेमा बुझेका सशस्त्र प्रहरी हवल्दारलाई खटाउँदा तस्करी रोकिने उद्देश्यले गुलाम हुसेन अन्सारीलाई डिआइजीले खटाएको हुनु पर्छ । तर, डिआइजीको उद्देश्यलाई लत्याउँदै अन्सारीले तस्करीको सुराकी नदिएर तस्करको सामान नेपालगन्ज ल्याउन मद्दत गरिरहेको सर्वसाधारण बताउँछन् ।
चार लाख ४६ हजार रुपैयाँको अवैध सामान बरामद
साढे १० लाखको अवैध सामान बरामद गरेको दुई दिन नवित्दै बाँके प्रहरीले बुधवार चार लाख ४६ हजार मूल्य बराबरको अवैध सामान नेपाल–भारत सीमानाका नजिकबाट बरामद गरेको छ ।
भारतबाट अवैध रुपमा ल्याएर भण्डारण गरेको सामान जिल्ला प्रहरी कार्यालयको टोलीले नेपालगन्ज उपमहानगरपालिका–१६ जयसपुरबाट सामान बरामद गरेको बाँके प्रहरी प्रवक्ता डिएसपी नारायण डाँगीले जानकारी दिए ।
उनका अनुसार प्रहरीले एक लाख १७ हजार ६ सय रुपैयाँ बराबरको एक सय ६८ जोडा बच्चाको जुत्ता, एक लाख मूल्य बराबरको दुई हजार जोडा लेडिज मोजा, ४८ हजार ६ सय मूल्यको तीन सय २४ जोडा बच्चाको चप्पल एक लाख २० हजार ६ सय रुपैयाँको चार सय दुई थान छालाको बेल्ट, १० हजार मूल्यको दुई सय मिटर कपडाको पर्दा र ५० हजार मूल्य बराबरको रेफ्रिजेरेन्ट ग्याँस बरामद गरेको छ ।
Discussion about this post