बाँके बैशाख २६ गते ।
तस्करीको समाचार संकलन गर्न गएका पत्रकारलाई भौतिक आक्रमण गर्ने र समाचार सम्प्रेषण भए नराम्रो हुने भन्दै त्रसाउने नेपालगन्जका कुख्यात तस्कर अमिर अहमद जोलाह (भौकी) अन्ततः प्रहरीको फन्दामा परेका छन् । नेपालगन्ज उपमहानगरपालिका १६ जयसपुरस्थित एक घरमा छापा मारेर लाखौं रुपैयाँ मूल्य बराबरको अवैध सामान बरामद गरेको बाँके प्रहरीले उनलाई पक्राउ गरेको छ ।
अवैध सामान भएको सूचना दिएको भन्दै भौकीले एक स्थानीयलाई कुटपिट गरेको बाँके प्रहरी प्रवक्ता डिएसपी नारायण डाँगीले जानकारी दिए । भौकीले स्थानीय मोहम्मद इरफान जोलाहालाई बन्धक बनाएर भौतिक आक्रमण गरेको प्रहरीले जनाएको छ ।
डिएसपी डाँगीका अनुसार, इरफानले दिएको जाहेरीका आधारमा भौकीलाई नियन्त्रणमा लिएर अनुसन्धान गरिरहेका बेला जिल्ला प्रहरी कार्यालय परिसरमा उनका भाई समिर अहमद जोलाहाले पीडित इरफानमाथि आक्रमण गरेका थिए । जिल्ला प्रहरी कार्यालय परिसरमा आक्रमण गर्ने भौकीका भाई समिरलाई पनि प्रहरीले नियन्त्रणमा लिएको छ ।
नेपालगन्ज नाकामा अबैध कारोबार गर्ने ‘कुख्यात तस्कर’ भौकीका भाई समिरले छलफलका क्रममा इरफानमाथि हातपात गरेपछि दाजुभाईलाई प्रहरीले जिल्ला प्रहरी कार्यालयको थुनुवा कोठामा राखेको छ । ‘सूचना दिएको आरोपमा बन्धक बनाएर भौतिक आक्रमण गरेको आरोपमा भौकी र उनका भाई समिरलाई नियन्त्रणमा लिएर कारवाही प्रक्रिया अगाडी बढाइएको छ,’ डिएसपी डाँगीले भने ।
पीडित इरफानले भौकी र उनका भाई समिरले बन्धक बनाएर कुटपिट गरेको आरोप लगाउँदै जिउ ज्यानको सुरक्षा माग गर्दै प्रहरीमा उजुरी दिएका थिए । उजुरीको आधारमा पक्राउ परेका भौकीले आफ्नो भाईलाई जिल्ला प्रहरी कार्यालयमा बोलाएर पीडित इर्फानमाथि आक्रमण गर्न लगाएको प्रहरीले आरोप लगाएको छ ।
समिर ‘छोटा भौकी’ का रुपमा परिचित छन् ।
‘भौकी’ ले तस्करीको सामान ल्याउँदै गरेको सूचनाको आधारमा समाचार संकलन गर्न गएका नेपालगन्जका एक पत्रकारमाथि भौकी र उनका चेलाहरुले आक्रमण गरि घाइते बनाएका थिए । भौकीले ड्यूटीमा खटिएका सशस्त्र प्रहरीलाई समेत हातपात गर्दै आएको बुझिएको छ । सशस्त्र प्रहरीलाई मोटो रकम दिएर तस्करी गर्दै आएका उनले ड्यूटीमा रहेका सशस्त्र प्रहरीले सोधपुछ गरेको भन्दै आक्रमण गर्दै आएको खुलेको छ ।
उनी पैँसा र राजनीतिक दलका नेताको आडमा तस्करी गर्दै आएका छन् ।
सशस्त्र प्रहरी, प्रशासन र भन्सार कर्मचारीलाई समेत प्रभावमा पार्दै आएका उनले दादागिरी शैलीमा तस्करी गर्दै आएका छन् । तस्करीको सामान नेपालगन्ज ल्याउने क्रममा फोटो र भिडियो खिच्ने क्रममा भौकीले एक जना पत्रकारलाई भिडियो र फोटो बाहिर ल्याए नराम्रो हुने धम्की दिएका छन् ।
सशस्त्र प्रहरी, नेपाल प्रहरी, प्रशासन र भन्सार कार्यालयका कर्मचारीलाई प्रभावमा पार्न माहिर उनलाई कारवाहीको दायरामा ल्याउन सर्वसाधारणले माग गरेका छन् । भौकीलाई कारवाही नभए उनले तस्करी गर्ने प्रश्य पाउने भन्दै सर्वसाधारणले उनलाई कानून बमोजिम कारवाही गर्न प्रहरी, प्रशासनसँग माग गरेका छन् । ‘भौकीले नाकामा आतंक मचाएका छन् । अवैध सामान ल्याएको सूचना दिए भौतिक कारवाही गर्ने धम्कीमात्र दिँदैनन्, सर्वसाधारणमाथि आक्रमण गर्न पछि पर्दैनन्,’ एक स्थानीयले भने ।
Discussion about this post