दाङ फागुन २३ गते ।
दाङमा प्रहरीले सुनका गरगहना चोरीसँगै बिक्रीवितरणमा संलग्न चार जनालाई पक्राउ गरेको छ । घोराही उपमहानगरपालिका–१, हर्नोकस्थित गीता पुन वलीको घरबाट सुनका गरगहना चोरी गरी बिक्रीवितरण गरेको आरोपमा सोही ठाउँ निवासी २४ वर्षीय प्रदीप भनिने विज्ञान घर्तीसहित चार जनालाई प्रहरीले पक्राउ गरेको हो ।
गरगहना चोरी गर्ने घर्तीसहित बिक्री गर्ने घोराही उपमहानगरपालिका–१५, काठेकोहल निवासी ३२ वर्षीय विक्रम चौधरी र उनकी २५ वर्षीय श्रीमती प्रतीक्षा केसीसँगै गरगहना खरिद गर्ने घोराही–१५, भीमसेन टोल निवासी ४१ वर्षीय सदन सुनारलाई पक्राउ गरेको जिल्ला प्रहरी कार्यालय दाङका सूचना अधिकारी चक्रबहादुर शाहले जानकारी दिए ।
शाहका अनुसार प्रदीप भनिने विज्ञान घर्तीले फागुनको १७ गते गीता पुन वलीको घरमा चोरी गरेको भन्ने निवेदनका आधारमा खटिएको प्रहरी टोलीले फागुनको २१ गते बुधबार घोराही–१७, सिस्नेखोलाबाट पक्राउ गरेको थियो । घटनामा संलग्न मुख्य व्यक्तिलाई पक्राउ गरेपछि उनको बयानका आधारमा अन्य संलग्न व्यक्ति पक्राउ गरिएको हो ।
Discussion about this post