बाँके कात्तिक २१ गते ।
देशभर काजमा रहेका प्रहरीहरूलाई फिर्ता पठाउने अभियान तीव्र भइरहेका बेला बाँकेमा भने उल्टो अभ्यास सुरु भएको छ। बाँकेमा बाहिर दरबन्दी रहेका प्रहरी अधिकृतहरूले प्रहरी प्रमुखको निकटता मार्फत कमाई हुने प्रहरी चौकीको इन्चार्जको जिम्मेवारी सम्हालिरहेका छन्।
प्रहरी स्रोतका अनुसार बाँकेमा दरबन्दी भएका प्रहरी अधिकृतहरूलाई पाखा लगाएर अन्य जिल्लामा दरबन्दी भएका अधिकृतहरूलाई जिम्मेवारी दिइँदै आएको छ। “जिल्लामा दरबन्दी भएकालाई पाखा लगाएर बाहिरी जिल्लाका जुनियर र सिनियर अधिकृतहरू इन्चार्ज बनाइएका छन्, यो दुर्भाग्यपूर्ण हो,” एक प्रहरी अधिकृतले नाम नखुलाउने शर्तमा भने, “बाँकेमा अहिले बाहिर दरबन्दी भएका प्रहरी अधिकृतहरूको हालीमुहाली छ।”
प्रहरी अधिकृतहरूका अनुसार बाँके प्रहरी प्रमुखलाई रिझाएर बाहिर दरबन्दी भएका अधिकृतहरू अहिले जिल्लाभर ‘राज’ गरिरहेका छन्। “एसपीलाई खुसी पार्न सकेपछि राम्रो चौकीमा पठाइन्छ, यही चलन अहिले पनि दोहोरिएको छ,” स्रोतले बतायो।
नेपाल प्रहरी लुम्बिनी प्रदेश कार्यालय दाङले हालै काजमा रहेका प्रहरीहरूलाई फिर्ता पठाउन निर्देशन जारी गरेको थियो। तर बाँके प्रहरी प्रमुख एसपी अंगुर जिसीले उक्त निर्देशनलाई कार्यान्वयन नगरी उल्टै काजमा रहेका अधिकृतहरूलाई प्रमुख चौकीहरूमा जिम्मेवारी दिएको आरोप लागेको छ। स्रोतका अनुसार बाँकेमा करिब डेढ सय प्रहरी काजमा छन्, जसमा ३० भन्दा बढी अधिकृत स्तरका छन्। तीमध्ये धेरैले कमाई हुने स्थानमा इन्चार्जको जिम्मेवारी पाएका छन्।
प्राविधिक फाँटमा खटिनुपर्ने प्रहरी अधिकृतहरू समेत इन्चार्जका भूमिकामा देखिएका छन्। “प्राविधिक अधिकृत प्रशासनिक काममा खटिन नपाइने प्रष्ट प्रावधान हुँदाहुँदै पनि यहाँ पावरको आडमा उनीहरू इन्चार्ज बनेका छन्,” स्रोतले भन्यो।
सुरक्षा विज्ञहरूका अनुसार लामो समय एउटै ठाउँमा काजमा रहँदा प्रहरी र स्थानीय तस्करबीच सञ्जाल बलियो बन्छ। “एकै ठाउँमा लामो समय बसेपछि स्रोतको पहिचान र अवैध कारोबारमा संलग्न व्यक्तिहरूसँग मिलोमतो बढ्छ, जसले असुलीधन्दा र भ्रष्टाचारलाई मलजल गर्छ,” एक सुरक्षा अधिकृतले बताए।
काजलाई निरन्तरता दिन अधिकृतहरूले राजनीतिक र आर्थिक दबाब समेत प्रयोग गर्ने गरेको आरोप पनि छ। बाँकेका प्रहरी अधिकृतहरूले भर्खरै आएका एसपीले सुरुवातमा भ्रष्टाचार नगर्ने प्रतिबद्धता जनाए पनि व्यवहारमा त्यसको उल्टो देखिएको बताएका छन्। “पहिलेकै जस्तो चाकडी प्रणाली अहिले पनि जारी छ,” एक अधिकृतले भने।
लुम्बिनी प्रदेशका अन्य जिल्लामा काजमा रहेका प्रहरीहरूलाई फिर्ता पठाउने काम भइरहेको छ। तर बाँकेमा भने त्यसको कार्यान्वयन नहुँदा प्रहरी वृत्तमै एसपी जिसीको भूमिकाप्रति शंका उठ्न थालेको छ।
Discussion about this post