बाँके मंसिर १६ गते ।
लागु औषध नियन्त्रणमा बाँके प्रहरीले अभियान थालेपछि लागु औषध कारोवारी र प्रयोगकर्ता धमाधम पक्राउ पर्न थालेका छन् । असोजदेखि हालसम्म ६० जना लागु औषध कारोवारी र प्रयोगकर्ता पक्राउ परेको जिल्ला प्रहरी कार्यालय बाँकेका सूचना अधिकारी समेत रहेका डिएसपी दीपक पातलीले अनलाइन खोजखवरलाई जानकारी दिए ।
उनले लागु औषध कारोवारी र प्रयोगकर्ता विरुद्ध ४० वटा मुद्धा दर्ता गरिएको बताए । ‘लागु औषध विरुद्ध अभियान थालेपछि प्रयोगकर्ता र कारोवारी धमाधम पक्राउ पर्न थालेका छन्,’ उनले भने ।
बाँकेको प्रहरी प्रमुखको जिम्मेवारी सम्हाल्ने वित्तिकै एसपी अंगुर जिसीले लागु औषध नियन्त्रणका लागि कडाई गर्न मातहतका प्रहरी कार्यालयलाई कडा निर्देशन दिएका छन् । उनले बाँकेमा बढ्दै गएको लागु औषध कारोवार र प्रयोगलाई न्यूनिकरण गर्न जस्तोसुकै कदम चाल्न निर्देशन दिएको एक प्रहरी अधिकृतले बताए ।
एसपी जिसीको कार्यशैली, कठोरता र जिम्मेवारीबोधले बाँके प्रहरीले नयाँ लय, नयाँ अनुशासन र नयाँ कार्यगत ऊर्जा पाएको अधिकृतहरूको भनाइ छ। एसपी जिसीको नेतृत्वमा बाँकेमा सुरू भएको अपराध नियन्त्रण अभियान अब केवल प्रहरीका लागि होइन,
अपराधमुक्त समाज चाहने सम्पूर्ण नागरिकका लागि आशा र विश्वासको नयाँ आधार बन्न थालेको छ।
लागु औषध नियन्त्रणका लागि एसपी जिसीले निर्देशन दिएको डिएसपी पातलीले बताए । उनले भने, ‘लागु औषध नियन्त्रणका कुनै कम्प्रोमाइज नगर्न मातहतका प्रहरी कार्यालयले एसपी सावको निर्देशन छ । सोही बमोजिम मातहतका प्रहरी कार्यालयले काम गरिरहेको पाइएको छ ।’
डिएसपी पातलीका अनुसार, प्रहरीले साढे दुई महिनामा एक सय ८९ ग्राम १७० मिलिग्राम ब्राउनसुगर, आठ सय २२ ट्याब्लेट नाइट्राजेपाम, एक हजार ६४ ट्याब्लेट ट्रामाडोल, तीन सय ५१ ग्राम गाँजा, चार किलोग्राम चरेश र एक सय ५२ ट्याब्लेट स्मास्मो बरामद गरेको छ । ‘बरामद लागु औषध अघिल्लो साढे दुई महिनाको भन्दा धेरै हो,’ उनले भने ।
करिव साढे दुई महिनाको अवधिमा बाँके प्रहरीले ९८ जना फरार अपराधि पक्राउ गरेको छ । फैसला कार्यान्वयन अन्तरगत फरार अपराधिलाई पक्राउ गर्ने सरकारको नीति बमोजिम धमाधम फक्राउ गरेको डिएसपी पातलीले बताए ।
पक्राउ परेका फरार अपराधिबाट ५४ वर्ष ११ महिना १७ दिन कैद र ७१ लाख दुई हजार १६० रुपैयाँ असुल उपर गरिएको उनले जानकारी दिए । ‘सरकारको नीतिलाई टेवा पुर्याउन अदालतबाट सजाय तथा जरिवाना फैसला भई फरार अपराधिलाई पक्राउ गर्ने बाँके प्रहरीले अभियान थालेको छ,’ उनले भने ।
Discussion about this post