बाँके फागुन ७ गते ।
सशस्त्र प्रहरी बल नेपालले बाँकेमा ठूलो परिमाणमा अवैध सामान बरामद गर्दै एक जनालाई पक्राउ गरेको छ।
सशस्त्र प्रहरी बल नेपाल सीमा सुरक्षा गुल्म हेडक्वाटर जमुनाह, बाँकेबाट खटिएको टोलीले नेपालगन्ज उपमहानगरपालिका–१६ जयसपुरस्थित सीमा क्षेत्रबाट अवैध रूपमा नेपाल भित्र्याइँदै गरेको अन्दाजी १० लाख रुपैयाँ बराबरको मोटर पाट्र्स र लत्ताकपडा बरामद गरेको हो।
त्यसैगरी, सशस्त्र प्रहरी बल नेपाल नं.३० गण हेडक्वाटर बागेश्वरी, बाँकेबाट खटिएको नौ सदस्यीय टोलीले नेपालगन्ज उपमहानगरपालिका–१५ पिप्रहवाबाट भारततर्फबाट अवैध रूपमा ल्याइँदै गरेको सामान नियन्त्रणमा लिएको जनाएको छ। सोही प्रकरणमा अटो नियन्त्रण गर्ने क्रममा कालिकोट रास्कोट नगरपालिका–८ निवासी २६ वर्षीय तपेन्द्र दर्जीलाई पक्राउ गरिएको सशस्त्र प्रहरीले जनाइएको छ।
भे.१ ह ६४२९ र भे.१ ह ४५३८ नम्बरका दुई वटा अटोमा राखी लत्ताकपडा, किराना सामान तथा सुर्तिजन्य पदार्थ नेपालतर्फ ल्याउँदै गरेको अवस्थामा नियन्त्रणमा लिइएको हो।
नियन्त्रणमा लिइएका दुवै अटो, सामान तथा सम्बन्धित व्यक्तिलाई आवश्यक कारबाहीका लागि नेपालगन्ज भन्सार कार्यालयमा बुझाइएको छ। अटो रिक्सा सहित बरामद सामानको भन्सार दाखिला मूल्य ५ लाख ५५ हजार २९५ रुपैयाँ कायम गरिएको सशस्त्र प्रहरीले जनाएको छ ।
उपरीक्षक भीमबहादुर चन्द हालै बाँके सरुवा भई आएपछि सीमा क्षेत्रमा हुने अवैध गतिविधि नियन्त्रणमा सक्रिय रूपमा परिचालित हुँदै आएका छन्। सीमा सुरक्षा तथा तस्करी नियन्त्रणमा कडाइ गरिने उनले बताए।
Discussion about this post