बाँके वैशाख २४ गते ।
प्रतिनिधिसभा निर्वाचन सम्पन्न भएपछि पुनः सुरु गरिएको मतदाता नामावली दर्ता कार्य बाँकेमा निरन्तर रूपमा जारी रहेको छ ।
जिल्ला निर्वाचन कार्यालय बाँकेका अनुसार हालसम्म जिल्लामा एक हजार ३ सय २६ जना नयाँ मतदाताले मतदाता नामावलीमा नाम दर्ता गराएका छन् ।
जिल्ला निर्वाचन कार्यालय बाँकेका प्रमुख टेकबहादुर शाहीका अनुसार नाम दर्ता गराएकामध्ये एक हजार ४८ जनाले राष्ट्रिय परिचयपत्रका आधारमा तथा २ सय ७८ जनाले अनलाइन वा कार्यालयमा उपस्थित भई आवेदन दिएका हुन् ।
गत चैत २२ गतेदेखि नाम दर्ताका लागि आवेदन खुला गरिएपछि जिल्ला निर्वाचन कार्यालयमा सेवाग्राहीको चाप बढ्दै गएको प्रमुख शाहीले जानकारी दिए । उनका अनुसार हाल दैनिक ३० देखि ४० जनासम्म नागरिक नाम दर्ताका लागि कार्यालय पुग्ने गरेका छन् ।
युवा मतदातामा अनलाइनमार्फत आवेदन दिने क्रम समेत बढ्दो रहेको कार्यालयले जनाएको छ । प्रमुख शाहीका अनुसार नाम दर्ता गर्ने अधिकांश सेवाग्राही २० देखि ४० वर्ष उमेर समूहका रहेका छन् ।
निर्वाचन कार्यालयका अनुसार भौतिक रूपमा उपस्थित भई नाम दर्ता गराउनेभन्दा अनलाइनमार्फत आवेदन दिने संख्या बढी रहेको छ । विभिन्न कारणले मतदाता नामावलीमा नाम छुटेका तथा हाल उमेर पुगेका नागरिकलाई लक्षित गर्दै आवेदन खुला गरिएको प्रमुख शाहीले बताए ।
उनले अनलाइनमार्फत त्रुटि सच्याउने तथा विवरण अद्यावधिक गर्ने कार्य पनि तीव्र रूपमा भइरहेको जानकारी दिए । सेवा प्रवाह सहज बनेसँगै नाम दर्ता तथा अद्यावधिक कार्य प्रभावकारी रूपमा सञ्चालन भइरहेको उनको भनाइ छ ।
Discussion about this post