बाँके वैशाख २८ गते ।
’बिहान खाउँ भने बेलुका छैन, बेलुका खाउँ भने बिहान छैन । सात दिन भयो खाना नखाएको । ढुङ्गा बोकेर, अरूको चर्पी सफा गरेर बनाएको घर अहिले भत्किँदैछ,’ भन्दै कोहलपुर–११, शान्तिनगरका सुकुमवासी गोरखबहादुर घर्ती आफ्नै घर भत्किँदा रुँदै आफ्नो पीडा पोख्दै थिए ।
कोहलपुर नगरपालिका–११, शान्तिनगर स्थित सुकुमवासी बस्ती अहिले तनावग्रस्त बनेको छ । एकातिर स्थानीयको रुवाबासी छ भने अर्कोतिर घरअगाडि सामान छरपस्ट देखिन्छन् । कपडा, झोला, सिरक, डसना लगायत दैनिक प्रयोगका सामग्री अस्तव्यस्त अवस्थामा छन् ।
त्यही सामानसँगै कमला शोनी आफ्नो पीडा समेटिरहेकी छन् । उनी कहिले सामान मिलाउँछिन् त कहिले घरतर्फ फर्केर हेर्छिन् । स्थानीय सरकारले बस्ती खाली गर्न निर्देशन दिएपछि धेरै परिवार विस्थापनको चिन्तामा छन् ।
उनले भनिन, ’हाम्रो बच्चा बिहान स्कुल जान लाग्दा ’घर भत्कियो भने हामी कहाँ जाने?’ भनेर सोध्छन्, हामी के जवाफ दिउँ?’
त्यस्तै छिमेकी शान्ती मगरको पीडा पनि उस्तै छ । उनी कहिले आँसु लुकाउने प्रयास गर्छिन् त कहिले घर छोड्नुपर्ने बाध्यताले भावुक बन्छिन् ।
कोहलपुर नगर विकास समितिको जग्गा अतिक्रमण गरी बसोबास गरिएको क्षेत्र खाली गर्ने अभियानअन्तर्गत शनिबार करिब ४० घर र आइतबार थप १४० घरटहरा हटाइएको छ । सो क्षेत्रमा करिब ७५१ परिवार बसोवास गर्दै आएका छन् ।
नगरपालिकाका अनुसार तीमध्ये केही अव्यवस्थित बसोवासी, भूमिहीन दलित र भूमिहीन सुकुमवासी परिवार छन् । डोल्पा, हुम्ला, कालिकोटलगायत जिल्लाबाट आएका परिवार पनि यहाँ बसोवास गर्दै आएका छन् ।
नगरपालिकाले वैशाख १६ गते १० दिने अल्टिमेटम जारी गर्दै अतिक्रमित क्षेत्र खाली गर्न आग्रह गरेको थियो । नगर प्रमुख पूर्णप्रसाद आचार्यका अनुसार स्वेच्छिकरूपमा हट्न पहिल्यै आग्रह गरिएको थियो ।
उनले वास्तविक भूमिहीन परिवारको व्यवस्थापन गर्ने योजना रहेको बताउँदै तथ्याङ्क प्रमाणीकरणपछि मात्रै वास्तविक लाभग्राही पहिचान भएको जानकारी दिए ।
यस अभियानमा स्थानीय प्रशासन, जनप्रतिनिधि, नगर प्रहरी र सुरक्षाकर्मी परिचालन गरिएको छ । विस्थापित परिवारका लागि अस्थायी बसोवासका रूपमा होल्डिङ सेन्टर सञ्चालनमा ल्याइएको नगरपालिकाले जनाएको छ ।
Discussion about this post