बाँके जेठ २ गते ।
नेपालगन्जमा आयोजित बृहत् निशुल्क तीन सय ५० बढीले स्वास्थ्य सेवा लिएका छन् । लाइफ लाइन जनरल हस्पिटल प्रालि र परिवर्तन समूहको संयुक्त आयोजनामा बृहत् निशुल्क स्वास्थ्य शिबिर आयोजना भएको हो ।
सर्खेतरोडस्थित गुरुद्वारामा भएको बृहत् निःशुल्क स्वास्थ्य शिविरमा ८० जनाले आँखा परीक्षण गराएको शिबिर आयोजक समेत रहेका दन्त चिकित्सक डा. प्रतिक श्रेष्ठले जानकारी दिए विभिन्न रोगका विशेषज्ञ चिकित्सकले सेवा दिएको शिबिरमा दुई सय ७० जनाले विभिन्न स्वास्थ्य स्वास्थ्य परीक्षणका साथै परामर्श सेवा लिएको उनले बताए ।
डा. श्रेष्ठका अनुसार दुई सय ८० भन्दा बढीको रगत परीक्षण गरिएको बताउँदै उनले मधुमेह (सुगर), उच्च रक्त्तचाप (प्रेसर) लगायत विभिन्न स्वास्थ्य परीक्षणसमेत गरिएको थियो । ’आँखा परीक्षणका क्रममा १० जना बिरामीको शल्यक्रिया गर्नुपर्ने देखिएपछि रेफर गरिएको छ,’उनले भने ।
आँखा जाँचको लागि नेपालगन्ज आँखा अस्पतालले सहकार्य गरेको बताउँदै उनले शिबिरमा सर्वसाधरणको उल्लेख्य सहभागिताले थप उत्साह थपेको बताए ।
यसैबीच, शिविरस्थलमै आयोजित रक्तदान कार्यक्रममा ४२ जनाले रक्तदान गरेको शिबिर आयोजकका संयोजकसमेत रहेका परिवर्तन समुहका सचिव सौरभ कर्माचार्यले जानकारी दिए । उपचारका लागि नेपालगन्ज आउने बिरामीलाई सहज रुपमा रगत उपलब्ध गराउने हेतुले रक्तदान कार्यक्रम आयोजना गरिएको उनले बताए ।
शिविरमा भेरी अस्पतालका कन्सल्टेन्ट फिजिसियन डा. संकेत रिसाल, ईएनटी सर्जन डा. दिनेश चौधरी, नेपालगन्ज स्किन सेन्टरका छाला रोग तथा सौन्दर्य विशेषज्ञ डा. अभिषेक अर्जेल, खजुरा क्यान्सर अस्पतालका मूत्ररोग विशेषज्ञ डा. प्रविन गुप्ता, फिजिसियन डा. त्रिस्टिन श्रेष्ठ तथा भेरी अस्पतालका कन्सल्टेन्ट फिजिसियन एवं मिर्गौला रोग विशेषज्ञ डा. पारस श्रेष्ठसहित मेडिकल अफिसरहरूको टोलीले सेवा प्रदान गरेको परिवर्तन समुहका अध्यक्ष ज्ञानकुमार श्रेष्ठले जानकारी दिए ।
शिविरमा चार सय बढी बिरामीलाई निःशुल्क औषधि समेत वितरण गरिएको उनले बताए ।
कार्यक्रममा नेपाल चिकित्सक संघ बाँके, नेपाल रेडक्रस सोसाइटी र नेपाल औषधि तथा बिक्री प्रतिनिधि संघले सहकार्य गरेका थिए ।
Discussion about this post