बाँके, जेठ १३ गते ।
लुम्बिनी प्रदेश सभाको आठौँ अधिवेशनअन्तर्गत आठौँ बैठक बुधबार दिउँसो १ बजे बस्ने भएको छ। बैठकमा प्रदेश सरकारको आर्थिक वर्ष २०८३/०८४ को नीति तथा कार्यक्रममाथिको छलफल टुङ्ग्याइने कार्यसूची रहेको छ।
प्रदेश सभा सचिवालयका अनुसार बैठकको प्रारम्भमा विपक्षी दलका नेता जोख बहादुर महराले विशेष समयमा सम्बोधन गर्नेछन्। त्यसपछि सामाजिक विकास मन्त्री जन्मजय तिमिल्सिनाले ‘थारु समुदायका प्रथाजनित परम्पराको संरक्षण सम्बन्धी विधेयक’ माथि सैद्धान्तिक छलफल गरियोस् भन्ने प्रस्ताव पेश गर्ने कार्यसूची रहेको छ।
उक्त प्रस्तावमाथि प्रदेश सभा सदस्यहरूले धारणा राख्नेछन् भने छलफलको जवाफ सामाजिक विकास मन्त्री तिमिल्सिनाले दिनेछन्।
त्यसैगरी, आर्थिक वर्ष २०८३/०८४ को नीति तथा कार्यक्रममाथि जारी छलफलका क्रममा उठेका प्रश्नहरूको जवाफ मुख्यमन्त्री चेतनारायण आचार्यले दिने कार्यसूची छ।
बैठकमा नीति तथा कार्यक्रम पारित गरियोस् भन्ने प्रस्ताव पेश गरिनेछ भने सभामुखले उक्त प्रस्ताव निर्णयार्थ प्रस्तुत गर्नेछन्। साथै, मुख्यमन्त्री आचार्यले विभिन्न आयोगका वार्षिक प्रतिवेदनहरू प्रदेश सभामा पेश गर्ने कार्यक्रम रहेको प्रदेश सभा सचिवालयले जनाएको छ।
Discussion about this post