बाँके, जेठ १२ गते ।
सवारी दुर्घटना न्यूनीकरणका लागि नेपालगन्जमा ई–रिक्सा व्यवस्थापनका लागि ट्राफिक सचेतना कार्यक्रम गरिएको छ । नेपालगन्ज उपमहानगरपालिकाको आयोजना तथा जिल्ला प्रहरी कार्यालय र जिल्ला ट्राफिलक प्रहरी कार्यालयको सहकार्यमा ई–रिक्सा व्यवस्थापनका लागि ट्राफिक सचेतना कार्यक्रम गरिएको हो ।
कार्यक्रममा नेपालगन्ज उपमहानगरपालिकाका मेयर प्रशान्त विष्टले नेपालगन्जमा दर्ता भएका ई–रिक्सालाई मात्र संचालन गर्न दिइने बताए । उनले सवारी चालक अनुमति पत्र साथमा बोक्नुपर्ने बताउँदै सवारी चालक अनुमति पत्र (लाइसेन्स) नभएकालाई ६० दिनभित्र बनाउन सुझाव दिए । ‘रातो नम्वर भएका, नेपालगन्ज उपमहानगरमा दर्ता नभएका र लाइसेन्स नभएकाले चलाएको पाइएमा कानुन वमोजिम कारवाही हुन्छ,’ उनले भने, ‘लाइसेन्स नभएकाले नेपाली नागरिकता साथ राख्नुपर्ने छ र ६० दिनभित्र लाइसेन्स बनाइसक्नु पर्ने छ ।’
बाँकेका प्रहरी प्रमुख एसपी अंगुर जिसीले ई–रिक्सालाई व्यवस्थित बनाउन र सवारी दुर्घटना न्यूनीकरण गर्न साता व्यापी सचेतना अभियान संचालन गरेको बताए । उनले लाइसेन्स नभएकाले चलाउँदा दुर्घटना बढेको बताउँदै उनले वीमा बापतको रकम नपाउने र जेल बस्न पर्ने अवस्था सिर्जना भएको बताए । ‘लाइसेन्स नभएकाले ई–रिक्सा चलाउँदा दुर्घटना बढेको छ नै घाइतेले उपचार नपाउने, चालक जेलमा बस्नुपर्ने र क्षतिपूर्ती नपाउने अवस्था छ,’ उनले भने ।
उनले १८ वर्षभन्दा मुनीकाले ई–रिक्सा चलाएको पाइए कानुन बमोजिम कारवाही गर्ने स्पष्ट पारे । लाइसेन्स बनाउनका लागि ६० दिनको समय दिएको बताउँदै उनले लाइसेन्स नभएकाको पहिचान गर्न सजिलो होस भन्ने हेतुले नागरिकता बोक्नुपर्ने नियम बनाएको बताए । ‘पहिलो चरणमा ६० दिनको समय दिएका छौँ । उक्त समयमा पनि लाइसेन्स नबनाए कानुन बमोजिम कारवाही हुन्छ,’ उनले भने ।
उनले एक हप्तासम्म सचेतना अभियान जारी रहने बताए । ‘प्रत्येक ई–रिक्सा चालकलाई सचेतना दिने र त्यसपछि पनि अँटेर गरे कारवाही हुन्छ,’ एसपी जिसीले भने ।
सचेतना अभियानमा ट्राफिक नियमको पालना गर्न, सवारी चालक र ब्लुबुक साथमा राख्न, ठूलो स्वरमा हर्न नबजाउन, सवारी साधन दर्ता गरेर मात्र चलाउन, निर्धारित रुटमा मात्र संचालन गर्न तथा यात्रुको सुरक्षालाई प्राथमिकतामा राख्न सचेतना दिइदै छ ।
Discussion about this post