बाँके, जेठ १३ गते ।
बाँकेको खजुरा गाउँपालिकाले निर्धारित समयभित्र निर्माण कार्य सम्पन्न नगर्ने पाँच वटा आयोजनाको ठेक्का रद्द गरेको छ ।
गाउँपालिकाका अनुसार वडा नं. ४ स्थित एफगाउँमा करिब ५०० मिटर सडक कालोपत्रे गर्ने कार्यका लागि २०७७ फागुन १२ गते अमन कन्स्ट्रक्सनसँग ठेक्का सम्झौता गरिएको थियो । सम्झौताअनुसार कम्पनीले २०७८ जेठ ३० गतेभित्र निर्माण सम्पन्न गर्नुपर्ने भए पनि हालसम्म काम पूरा हुन सकेको छैन ।
दुई चरणमा छुट्टाछुट्टै ठेक्का आह्वान गरिएको उक्त योजनाअन्तर्गत ग्राभेल हाल्ने र गिट्टी बिछ्याउने काम सम्पन्न भए पनि कालोपत्रे कार्य रोकिँदा सडक पुनः जीर्ण अवस्थामा पुगेको स्थानीयले बताएका छन् ।
त्यसैगरी, अमन कन्स्ट्रक्सनले जिम्मा लिएका एनआइसी बैँकदेखि मनकामना मन्दिर जाने सडक तथा नाली निर्माण, गोपालसिंह आलेको घरदेखि लालबहादुर रजालीको घरसम्मको बाटो स्तरोन्नति तथा बिगाउँ ९० नम्बरदेखि १०५ नम्बरसम्मको सडक स्तरोन्नतिसहितका अन्य योजना पनि वर्षौंदेखि अलपत्र अवस्थामा रहेका छन् ।
निर्माण कार्यको प्रगति सन्तोषजनक नभएको, पटक–पटक ताकेता गर्दा पनि सुधार नआएको तथा निर्माण व्यवसायी काम सम्पन्न गर्न गम्भीर नदेखिएकाले पाँचवटै ठेक्का सम्झौता रद्द गरिएको गाउँपालिकाले जनाएको छ ।
प्रमुख प्रशासकीय अधिकृत दिलबहादुर पौडेलका अनुसार गाउँपालिकाले गत मङ्सिर २ गते सार्वजनिक सूचना जारी गर्दै निर्माण व्यवसायीलाई सम्झौता रद्द गरी कालोसूचीमा किन नराख्ने भन्नेबारे स्पष्टिकरण मागेको थियो ।
उनले सूचना जारी भएपछि केही निर्माण व्यवसायी सम्पर्कमा आए पनि काम सम्पन्न गर्ने विश्वसनीय आधार प्रस्तुत गर्न नसकेकाले अन्ततः ठेक्का सम्झौता अन्त्य गरिएको बताए ।
गाउँपालिकाले सार्वजनिक खरिद ऐन, २०६३ तथा सार्वजनिक खरिद नियमावली, २०६४ अनुसार सेवा अन्त्यपछिको मूल्याङ्कनबाट कायम हुने रकम सरकारी बाँकीसरह असुलउपर गरिने जनाएको छ । साथै, सम्बन्धित निर्माण कम्पनीलाई १५ दिनभित्र कार्यालयमा सम्पर्क गरी वित्तीय फरफारक गर्न निर्देशन दिइएको छ ।
Discussion about this post