बाँके जेठ १६ गते ।
राष्ट्रिय गौरवको आयोजनाका रूपमा रहेको बाँकेको निर्माणाधीन सिक्टा सिँचाइ आयोजनाले आगामी आर्थिक वर्ष २०८३÷८४ का लागि उल्लेख्य बजेट प्राप्त गरेको छ।
अर्थमन्त्री डा. स्वर्णिम वाग्लेले शुक्रबार संघीय संसद्मा प्रस्तुत गरेको बजेटमा आयोजनाका लागि रु २ अर्ब ५५ करोड विनियोजन गरिएको छ। चालु आर्थिक वर्ष २०८२÷८३ मा आयोजनाले रु १ अर्ब ५७ करोड बजेट प्राप्त गरेको थियो। आयोजनाका सूचना अधिकारी तथा सिनियर डिभिजनल इञ्जिनियर मनोजकुमार साहका अनुसार गत वर्षको तुलनामा यस वर्ष करिब रु ९८ करोड बढी बजेट विनियोजन भएको हो।
हाल आयोजनाअन्तर्गत डुडुवा शाखा नहर निर्माण तीव्र गतिमा अघि बढिरहेको छ। साथै सिधनिया, प्रसेनीपुर र अकलघरवा शाखा नहरका लागि ठेक्का सम्झौता भई निर्माण कार्यलाई गति दिइएको छ। त्यसैगरी गुरुवागाउँ र अकलघरवा उपशाखा नहर तथा पूर्वी मूल नहरका बाँकी संरचना निर्माणका लागि आवश्यक पूर्वतयारीका कामहरू पनि जारी रहेको सूचना अधिकारी साहले बताए।
बाँकेको राप्ती सोनारी गाउँपालिका–२, अगैयास्थित राप्ती नदीमा बाँध निर्माण गरी जिल्लाका खेतीयोग्य जमिनमा वर्षभरि सिँचाइ सुविधा पु¥याउने उद्देश्यसहित यो आयोजना कार्यान्वयनमा ल्याइएको हो। आर्थिक वर्ष २०६२÷६३ मा सुरु भएको आयोजना संशोधित गुरुयोजनाअनुसार आर्थिक वर्ष २०८९÷९० भित्र सम्पन्न गर्ने लक्ष्य राखिएको छ।
आयोजनाको निर्माणाधीन पश्चिमी मूल नहरमार्फत राप्ती नदी पश्चिम क्षेत्रका ३३ हजार ७६६ हेक्टर जमिनमा सिँचाइ सुविधा विस्तार गर्ने लक्ष्य छ। यस्तै पूर्वी मूल नहरबाट राप्ती नदी पूर्वी क्षेत्रका करिब ९ हजार हेक्टर जमिनमा सिँचाइ सुविधा पु¥याइनेछ।
संशोधित गुरुयोजनाअनुसार आयोजनाको कुल लागत रु ५२ अर्ब ८९ करोड अनुमान गरिएको छ।
यसैबीच, अर्थमन्त्री डा. वाग्लेले प्रस्तुत गरेको आगामी आर्थिक वर्षको बजेटमा बाँके जिल्लालाई प्रत्यक्ष रूपमा सम्बोधन गरिएको प्रमुख आयोजना सिक्टा सिँचाइ आयोजना मात्रै परेको देखिएको छ।
Discussion about this post