बाँके, असार १८ गते ।
बाँकेको दुर्गम मानिने राप्तीसोनारी गाउँपालिकामा भूमि प्रशासन कार्यालय सञ्चालनमा आएको छ।
गाउँपालिकाको पहल तथा भूमि व्यवस्था, सहकारी तथा गरिबी निवारण मन्त्रालयअन्तर्गतको भूमि व्यवस्थापन तथा अभिलेख विभाग र भूमि प्रशासन कार्यालय, कोहलपुरको समन्वयमा कार्यालय सञ्चालनमा ल्याइएको हो।
कार्यालय सञ्चालनसँगै अब राप्तीसोनारी गाउँपालिकाका सेवाग्राहीले जग्गा दर्ता, नामसारी, जग्गाधनी दर्ता प्रमाणपुर्जाको प्रतिलिपि, अभिलेख व्यवस्थापनलगायत भूमि प्रशासनसम्बन्धी विभिन्न सेवा आफ्नै पालिकाबाट प्राप्त गर्न सक्ने भएका छन्। यसबाट सेवाग्राहीको समय, खर्च तथा अनावश्यक झन्झटमा कमी आउने अपेक्षा गरिएको गाउँपालिकाले जनाएको छ।
कार्यालयको उद्घाटन गाउँपालिका अध्यक्ष तप्त पौडेलले एक समारोहबीच गरेका हुन्। उद्घाटन समारोहलाई सम्बोधन गर्दै अध्यक्ष पौडेलले भूमि प्रशासन कार्यालय सञ्चालन स्थानीय नागरिकका लागि महत्त्वपूर्ण उपलब्धि भएको बताए।
उनले सामान्य भूमि सम्बन्धी सेवाका लागि अब टाढा धाउनुपर्ने बाध्यताको अन्त्य भएको उल्लेख गर्दै स्थानीय तहमै छिटो, सहज र पारदर्शी सेवा उपलब्ध हुने विश्वास व्यक्त गरे।
कार्यालय सञ्चालनको पहिलो दिन राप्तीसोनारी गाउँपालिका–९ निवासी रोशनकुमार वलीलाई जग्गाधनी दर्ता प्रमाणपुर्जाको प्रतिलिपि प्रदान गर्दै सेवाको औपचारिक शुभारम्भ गरिएको थियो।
सेवा प्राप्त गरेपछि वलीले खुसी व्यक्त गर्दै भने, “कार्यालय गाउँमै सञ्चालनमा आएपछि अब भूमिसम्बन्धी कामका लागि टाढा सहर जानुपर्ने अवस्था अन्त्य भएको छ। यसबाट हाम्रो समय र खर्च दुवैको बचत हुनेछ।”
उद्घाटन कार्यक्रममा गाउँपालिका अध्यक्ष पौडेलसहित जनप्रतिनिधि, प्रमुख प्रशासकीय अधिकृत, भूमि प्रशासन कार्यालय कोहलपुरका प्रमुख तथा कर्मचारी र स्थानीय सर्वसाधारणको उपस्थिति रहेको थियो।
कार्यक्रममा सहभागीहरूले स्थानीय तहबाटै भूमि प्रशासन सेवा उपलब्ध हुनु नागरिकमैत्री शासन, प्रभावकारी सेवा प्रवाह तथा सुशासन प्रवद्र्धनतर्फको महत्त्वपूर्ण कदम भएको धारणा व्यक्त गरेका थिए।
Discussion about this post