बाँके, भदौ १० गते ।
मोहम्मद डेको अवसरमा गणपति डेन्टल क्लिनिक र रोशन मेटल क्राफ्ट इन्डस्ट्रिजले नेपालगन्जमा आयोजित जुलुसमा सहभागी सर्वसाधारणलाई पानी, जुस, बिस्कुट, चकलेट र चिप्स वितरण गरेका छन्।
गणपति डेन्टल क्लिनिकका सञ्चालक डा. प्रतीक श्रेष्ठ र रोशन मेटल क्राफ्ट इन्डस्ट्रिजका सञ्चालक रोशन मलिक जसगरको संयुक्त आयोजनामा नेपालगन्जको बीपी चोकमा सामग्री वितरण गरिएको हो।
मोहम्मद डे मनाउन आयोजित जुलुसमा सहभागीहरूलाई गर्मीका कारण असहज नहोस् भन्ने उद्देश्यले पानी, जुस तथा खाद्य सामग्री वितरण गरिएको आयोजकले जनाएको छ। जुलुसमा सहभागी सर्वसाधारणलाई लक्षित गरी सामग्री वितरण गरिएको हो।
गणपति डेन्टल क्लिनिकका सञ्चालक डा. प्रतीक श्रेष्ठले मोहम्मद डेको अवसरमा धार्मिक तथा सामाजिक सद्भावको सन्देश दिन कार्यक्रम आयोजना गरिएको बताए। नेपालगन्ज विभिन्न समुदायबीचको एकता, भाइचारा र आपसी सद्भावका लागि चिनिएको सहर भएको भन्दै उनले यस्ता गतिविधिले सामाजिक सम्बन्ध थप बलियो बनाउने बताए।
‘स्वास्थ्यसँगै समाजलाई पनि स्वस्थ राख्न विभिन्न समुदायबीचको एकता, भाइचारा र आपसी मेलमिलाप आवश्यक छ,’ उनले भने, ‘मोहम्मद डेको अवसरमा जुलुसमा सहभागी दाजुभाइ तथा दिदीबहिनीलाई सहज होस् भनेर पानी तथा खाद्य सामग्री वितरण गरेका हौं।’
उनले मोहम्मद डेको अवसरमा सबैमा सुख, शान्ति र समृद्धिको शुभकामना व्यक्त गर्दै सामाजिक उत्तरदायित्वअन्तर्गत गरिने यस्ता कार्यक्रमलाई आगामी दिनमा पनि निरन्तरता दिने बताए।
त्यस्तै, रोशन मेटल क्राफ्ट इन्डस्ट्रिजका सञ्चालक रोशन मलिक जसगरले मोहम्मद डे नेपालगन्जमा उत्साहपूर्वक मनाइएको बताए। जुलुसमा सहभागीलाई सेवा गर्ने उद्देश्यले संयुक्त रूपमा पानी तथा खाद्य सामग्री वितरण गरिएको उनले बताए।
नेपालगन्ज धार्मिक तथा सामाजिक सद्भावको सहर भएकाले विभिन्न धार्मिक तथा सांस्कृतिक अवसरले समुदायबीचको सम्बन्ध थप मजबुत बनाउन सहयोग पुग्ने मलिकले बताए। सबै समुदायबीच एकता, भाइचारा र आपसी सम्मान कायम राख्नुपर्नेमा उनले जोड दिए।
आयोजकले सामाजिक उत्तरदायित्वअन्तर्गत आगामी दिनमा पनि समुदायको हित र आवश्यकतालाई ध्यानमा राखेर विभिन्न सेवा तथा सहयोगका कार्यक्रम सञ्चालन गर्ने बताएका छन्।
Discussion about this post