बाँके, असोज ३० गते ।
दसैंमा किनमेल गर्न नेपाली उपभोक्ताको घुइँचो लाग्ने भारतीय बजार रुपैडिहा यस वर्ष सुनसानजस्तै छ । विगतमा चाडपर्व आउनुभन्दा एक महिनाअघिदेखि नै नेपाली उपभोक्ताले भरिभराउ हुने रुपैडिहामा यसपटक चहलपहल घटेको छ । यसको ठीक उल्टो सीमावर्ती नेपाली सहर नेपालगन्जमा भने दसैंको किनमेल बढेको छ ।
भारतबाट सामान ल्याउँदा भन्सार महसुल तिर्नुपर्ने नियमको कडाइका साथ कार्यान्वयन हुन थालेपछि किनमेलकै लागि सीमापारि जाने नेपाली उपभोक्ताको संख्या घटेको हो । यसको प्रभाव भारतीय बजारमा देखिएको छ भने नेपालगन्जसहित बाँकेका अन्य बजारमा व्यापार बढेको स्थानीय व्यापारीले बताएका छन् ।
रुपैडिहा उद्योग व्यापार प्रतिनिधि मण्डलका नगर अध्यक्ष शैलेश जायसवालले यस वर्ष दसैंका लागि किनमेल गर्न आउने नेपाली उपभोक्ताको संख्या निकै कम भएको बताए । नाकामा सामान ल्याउन कडाइ गरिएकाले नेपाली उपभोक्ता रुपैडिहा आउन छाडेको उनको भनाइ छ ।
‘गत वर्षसम्म ठूला चाडपर्व आउनुभन्दा एक महिनाअघिदेखि नै रुपैडिहा बजारमा नेपाली उपभोक्ताको घुइँचो लाग्थ्यो,’ जायसवालले भने, ‘बाँकेसहित बर्दिया, सुर्खेत र दाङबाट समेत सामान किन्न आउने गर्थे । यसपटक भने त्यो चहलपहल छैन ।’
नेपाल सरकारले भारतबाट पाँच सय रुपैयाँभन्दा बढी मूल्यका सामान ल्याउँदा भन्सार महसुल तिर्नुपर्ने व्यवस्था कार्यान्वयनमा कडाइ गरेको छ । साथै, प्रतिबन्धित सामान ल्याउन नदिने नियम पनि कडाइका साथ लागू गरिएको छ । यसले सीमापारिको व्यापार प्रभावित भएको भारतीय व्यापारीहरूको भनाइ छ ।
सीमामा गरिएको कडाइको प्रभाव नेपालगन्जसहित बाँकेका बजारमा देखिएको छ । विगतमा दसैंजस्तो ठूलो चाडपर्वमा पनि अपेक्षित व्यापार नहुने नेपालगन्जमा यस वर्ष भने कारोबार बढेको स्थानीय व्यापारीले बताएका छन् ।
नेपालगन्ज उद्योग वाणिज्य संघका अध्यक्ष चिरञ्जीवी ओलीले यसपटक दसैंको व्यापारमा उल्लेख्य सुधार आएको बताए । नेपाली उपभोक्ताले स्वदेशमै किनमेल गर्न थालेपछि नेपालगन्ज, कोहलपुर, खजुरा र राँझाका बजारमा चहलपहल बढेको उनको भनाइ छ ।
‘नाकामा कडाइ भएपछि धेरै उपभोक्ताले आफ्नै देशमा सामान किन्न थालेका छन्,’ ओलीले भने, ‘यसले नेपालगन्ज र कोहलपुरमा मात्रै होइन, पहाडी जिल्लाका बजारमा समेत व्यापार व्यवसाय चलायमान बनाउन सहयोग गरेको छ ।’
विगतमा दसैंको किनमेलका लागि रुपैडिहा जाने गरेका उपभोक्ता यसपटक नेपालगन्जकै बजारमा देखिन थालेका छन् । नेपालगन्ज–११ इदगाह रोडका दीपक गुप्ताले नाकामा कडाइ गरिएपछि सीमापारि जान छाडेको बताए । उनले यस वर्ष दसैंका लागि आवश्यक सामान नेपालगन्जमै खरिद गरेको जानकारी दिए ।
त्यस्तै, नेपालगन्ज–१ खजुरा रोडकी लक्ष्मी चौधरीले पनि यस वर्ष चाडपर्वको किनमेल स्वदेशमै गरेको बताइन् । विगतमा सामान किन्न सीमापारि जाने गरे पनि यसपटक नेपालगन्जमै किनमेल गरेको उनको भनाइ छ ।
सीमामा गरिएको कडाइले भारतीय बजारमा नेपाली उपभोक्ताको चहलपहल घटाएको छ भने नेपाली बजारमा किनमेल गर्नेको संख्या बढाएको छ । यसले चाडपर्वका बेला स्वदेशी व्यापार व्यवसायलाई राहत पुगेको स्थानीय व्यापारीको अपेक्षा छ ।
Discussion about this post