बाँके, असोज ३० गते ।
बाँकेको खजुरास्थित इलाका प्रहरी कार्यालय धनौली देशभरका प्रहरी कार्यालयमध्ये सर्वोत्कृष्ट घोषित भएको छ। नेपाल प्रहरी कार्यदक्षता मूल्याङ्कन २०८३ मा प्रथम हुँदै धनौलीले प्रहरी कार्यदक्षता पुरस्कार प्राप्त गरेको हो।
कार्यालयका प्रमुख प्रहरी निरीक्षक नवीनप्रकाश चापागाईं पनि देशभरकै सर्वोत्कृष्ट इलाका प्रहरी कार्यालय प्रमुखका रूपमा पुरस्कृत भएका छन्। प्रहरी दिवसको अवसरमा शुक्रबार प्रहरी महानिरीक्षक दानबहादुर कार्कीले उनलाई प्रशंसापत्र प्रदान गरेका हुन्।
नेपाल प्रहरी प्रधान कार्यालयका अनुसार चापागाईंले कार्यालय प्रमुखका रूपमा प्रदर्शन गरेको व्यावसायिकता, निष्ठा, मातहतका प्रहरी कर्मचारीको परिचालन र कार्यकुशलतालगायत पक्षको समग्र मूल्याङ्कनका आधारमा उनलाई सर्वोत्कृष्ट कार्यालय प्रमुख घोषित गरिएको हो।
देशभर प्रहरी निरीक्षक र प्रहरी नायब उपरीक्षक कार्यालय प्रमुख रहेका इलाका प्रहरी कार्यालय, प्रहरी वृत्त, वडा प्रहरी कार्यालय तथा प्रहरी प्रभागबीच गरिएको कार्यदक्षता मूल्याङ्कनमा धनौलीले पहिलो स्थान हासिल गरेको हो।
नेपाल प्रहरीको ७१औँ प्रहरी दिवस २०८३ का अवसरमा प्रदान गरिएको यो पुरस्कारले बाँकेको खजुरास्थित इलाका प्रहरी कार्यालय धनौलीको कार्यसम्पादनलाई राष्ट्रियस्तरमा उत्कृष्ट ठहर गरेको छ।
Discussion about this post