सुनसरी मंसिर १५ गते । पुर्वपश्चिम राजमार्ग अन्तर्गत सुनसरीको हरिपुरमा गएराति एम्बुलेन्स र ट्रक एकआपसमा ठोक्किएर भएको दुर्घटनामा सात जनाको मृत्यु भएको छ । मृत्यु हुनेमा उदपपुर त्रियुगा नगरपालिका– ९ का दुर्गाधन राई, टेकेन्द्र राई, तुलाबहादुर राई, मुकेश राई, दिनेश राई, शिवमाया राई रहेका छन् ।
त्यस्तै एम्बुलेन्सका चालक राजेश दनुवारको पनि दुर्घटनामा मृत्यु भएको छ । मृत्यु हुने सबै एम्बुलेन्समा सवार थिए । गएराति एक बजे विराटनगरस्थित गोल्डेन अस्पतालबाट उदयपुर जाँदै गरेको को १ च ९३६४ नम्बरको एम्बुलेन्स र वीरगंजबाट विराटनगर जाँदै गरेको ना २ ख ९०८२ ट्रक एकआपसमा ठोक्किएका हुन् ।
तीव्र गतिका कारण दुर्घटना भएको प्रहरीको अनुमान छ । मृतकहरुको पहिचान खुल्न बाँकी छ । ट्रकसँग ठक्कर खाएपछि उछिट्टिएको एम्बुलेन्स सडकमा उत्तानो परेको थियो ।
एम्बुलेन्समा च्यापिएका मृतकहरुको शव बाहिर निकाल्न चार घन्टा समय लागेको प्रहरीले जनाएको छ । दुर्घटनापछि ट्रकका चालक फरार रहेकाले खोजी भैरहेको प्रहरीले जनाएको छ ।
Discussion about this post