सरला सुबेदी
बाँके बैशाख १४ गते । विश्वव्यापी महामारी कोरोना भाइरसबाट मर्नेको संख्या २ लाख नाघेको छ । शनिबार राती कोरोनाबाट मर्नेको संख्या २ लाख ४ सय ५ पुगेको अन्तराष्ट्रिय सञ्चारमाध्यमले जनाएका छन ।
अहिलेसम्म २ सय १० देशका २८ लाख ७० हजार मानिस संक्रमित छन । कोरोनाले सबैभन्दा धेरै अमेरिकामा ५२ हजार भन्दा धेरै मानिसको ज्यान गएको छ । ९ लाख बढी मानिस संक्रमित छन । यस्तै इटालीमा झण्डै २६ हजारको ज्यान जाँदा १ लाख ९२ हजार मानिस संक्रमित छन ।
यस्तै स्पेनमा झण्डै २३ हजार मानिसको ज्यान गएको छ । अहिलेसम्म २ लाख २३ हजार मानिस संक्रमित छन । यस्तै फ्रान्समा कोरोनाले २२ हजार मानिसको मृत्यु भएको छ भने १ लाख ५९ हजार संक्रमित रहेका छन ।
यस्तै बेलायतमा २० हजार मानिसको ज्यान गएको छ । १ लाख ४८ हजार संक्रमित छन । जर्मनीमा झण्डै ६ हजार मानिसको ज्यान जाँदा साढे १ लाख मानिस कोरोनाको संक्रमणमा छन ।
यस्तै बेल्जियममा ६ हजार, इरानमा ५ हजार, चीन र नेदरल्याण्ड्समा समान ४ हजार, ब्राजिलमा ३ हजार, क्यानडा र टर्कीमा समान २ हजार तथा स्वीट्जरल्याण्डमा १५ सय बढी मानिसको ज्यान गएको छ ।
छिमेकी देश भारतमा अहिलेसम्म झण्डै २५ हजार संक्रमित हुँदा झण्डै ८ सय मानिसको ज्यान गएको छ । नेपालमा भने ४९ जना कोरोना संक्रमित छन । तर अहिलेसम्म कसैको ज्यान गएको छैन ।
विश्वभर अहिलेसम्म ८ लाख १६ हजार मानिस उपचारपछि घर फर्किएका छन । सबैभन्दा धेरै अमेरिका र जर्मनीका एक एक लाख मानिस घर फर्किएका छन । नेपालमा संक्रमित ४९ जनामध्ये १२ जना उपचारपघि घर फर्किसकेका छन ।
Discussion about this post