जुम्ला बैशाख २८ गते ।
कोरोना भाइरसको जोखिम हुन नदिन जुम्लाको गुठीचौर गाउँपालिका १ मा तयार गरिएको क्वारेन्टाइनमा बसेर २५ जना १४ दिनपछि घर फर्किएका छन्। उनीहरुलाई सो गाउँपालिकाले खादा ओढाएर सम्मानसहित घर फर्काएको छ।
क्वारेन्टाइनमा रहनेका लागि सो वडाले खाना र स्वास्थ्य व्यवस्थापन गरेको वडाध्यक्ष गणेश ऐडीले जानकारी दिए। पशु सेवा केन्द्रको भवन र खडकदेवी माध्यामिक विद्यालयमा क्वारेन्टाइन निर्माण गरिएको थियो।
स्थानीय सरकारको आग्रह र नियमलाई अनुशरण गर्दै क्वारेन्टाइनमा बसेको भन्दै वडाले सम्मानका साथ बिदाइ गरी घर पठाएको हो। वडाध्यक्ष ऐडीका अनुसार १४ दिनसम्म नियमपूर्वक बसी वडालाई सहयोग गरेकाले सम्मानका साथ बिदाइ गरिएको हो।
क्वारेन्टाइनमा बसेका मध्ये सात जनाको आरडिटी परीक्षणपछि घर फर्काइएको छ। अन्य १८ जनाको पिसिआर गर्ने सर्तमा घर पठाइएको छ। क्वारेन्टाइन सञ्चालन तथा व्यवस्थापन गर्न बनेको मापदण्ड(२०७६ अनुसार उनीहरुलाई एक शैयादेखि अर्को शैयासम्मको न्यूनतम दुरी साढे तीन फिटको फरक थियो।
लकडाउन अवधिमा यहाँ १० हजार ८३८ भित्रिएका छन्। ५२१ शैयाको क्वारेन्टाइनमा २०५ जना बसेका छन् भने ९०५ जना १४ दिनपछि घर फर्केको शनिबार जिल्ला प्रशासन कार्यालयले सार्वजनिक गरेको तथ्यांकमा उल्लेख छ।
त्यसैगरी ५१६ होम क्वारेन्टाइनमा बसेका छन्। जुम्लामा ४१५ को पिसिआर र २६१ जनाको आरडिटी परीक्षण भएको र सबैको रिपोर्ट नेगेटिभ रहेको कर्णाली स्वास्थ्य विज्ञान प्रतिष्ठान शिक्षण अस्पतालका निर्देशक डा। मंगल रावलले बताए।
यहाँ ४१५ जनाको कोरोना पिसिआर जाँच गरिएको छ। भारत, तेस्रो मुलक र नेपालका विभिन्न जिल्लाबाट आएका व्यक्तिलाई कोरोना पिसिआर जाँच गरिएको हो।
यहाँबाट स्वाब संकलन गरी सुर्खेत तथा काठमाडौँमा पठाएर ३३९ जनाको पिसिआर परीक्षण गरिएको थियो। सो अस्पतालले २२ वैशाखदेखि कोरोना परीक्षण पिसिआर उपकरण सञ्चालनमा ल्याएदेखि जुम्लामा ७६ गरी जम्मा ४१५ जना परीक्षण गरिएको हो।
पिसीआर परीक्षणमा सबैको रिपोर्ट नेगेटिभ आएको प्रमुख जिल्ला अधिकारी दुर्गा बञ्जाडेले जानकारी दिए।रासस
Discussion about this post