खोजखबर संवाददाता
बाँके भदौ ४ गते । राजधानीस्थित नयाँ बानेश्वरस्थित संसद भवनमा सुविधासम्पन्न चमेना गृह खुलेको छ। करिब ६ महिना निर्माण अवधि तोकिएको चमेना गृह ५ दिनअघि नै सम्पन्न भई बुधवार हस्तान्तरण भएको हो। शहरी विकास मन्त्री मोहम्मद इस्तियाक राईले बुधबार बिहान उक्त चमेना गृहको उद्घाटन गरे।
सो अवसरमा मन्त्री राईले मुुलुकमा धेरैजसो आयोजना तोकिएको समयमा सम्पन्न नहुने समस्या देखिएको भन्दै इमान्दारीपुर्वक जिम्मेवारी निर्वाह गरे समयमै सम्पन्न हुने सन्देश चमेना गृहको निर्माणले दिएको बताए। अन्तर्राष्ट्रिय सम्मेलन केन्द्र विकास समितिको अध्यक्ष समेत रहेका मन्त्रालयका सचिव मधुसुदन अधिकारीले मन्त्रालय र कर्मचारीको आवश्यक समन्वय र सहकार्यले समयमै काम सम्पन्न भएको बताए।
शहरी विकास मन्त्रालयअन्र्तगतको अन्तर्राष्ट्रिय सम्मेलन केन्द्र विकास समितिले गत फागुन ९ गते घिसिङ/कुँवर जे.भी. निर्माणलाई २ करोड ७८ लाख रुपैयाँ लागतमा चमेना गृहको निर्माणका लागि ठेक्का दिएको थियो। करिब १० हजार ५ सय ५७ बर्ग फिट क्षेत्रफलमा निर्माण भएको चमेना गृहमा १ सय ८६ जना सम्मको भोजन कक्षको क्षमता रहेको मन्त्रालयका सहसचिव एवं सम्मेलन केन्द्रका कार्यकारी निर्देशक कृष्ण प्रसाद दवाडीले बताए। दवाडीले भने, ‘भिभिआइपी र अर्डिनरीका लागि छुट्टै हल छ। यो चमेना गृहको टार्गेट नै प्रतिनिधि सभा र राष्ट्रिय सभाको बैठक चलेका बेला सांसदहरुलाई सुविधा दिनु हो। यहाँ देशकै बिग सिक्स व्यक्तिले सेवा लिन सक्नुहुन्छ।’
उनले भिभिआइपीले सेवा लिने भएकाले सोही अनुसारको चमेना गृह बनाइएको बताए। ‘दुई वटा भान्सा छन्, एउटा साधारण र अर्को मुस्लिम समुदायका लागि हलाल गरिएको मासु पकाउन मिल्ने बनाइएको छ’, दवाडीले सेतोपाटीसँग भने, ‘राष्ट्रिय सभामा अपाङ्ग सांसदहरुको प्रतिनिधित्व छ। हामीले यो चमेना गृह नै अपाङ्ग मैत्री बनाएका छौँ। पुरुष र महिलाका लागि ४ वटा शौचालय छ। सबै अपाङ्गमैत्री छन्।’ मुस्लिम समुदायका लागि समेत हलाल खाना बनाउन छुट्टै भान्छाघरको व्यवस्था गरिएको छ। उक्त गृहमा डाइनिङ हल, भण्डार कक्षका साथै अति विशिष्ट व्यक्तिहरुका लागि छुट्टै भोजन कक्षको समेत व्यवस्था गरिएको छ।
उनले चमेना गृह संघीय संसद सचिवालयले सञ्चालन गर्ने तथा मर्मत सम्भारको काम गर्ने बताए। हाल बानेश्वरस्थित संघीय संसद भवनमा पार्किङका लागि बनाइएको ठाउँमा चमेना गृह सञ्चालन हुँदै आएको छ। संसदको चमेना गृह व्यवस्थित नभएको गुनासोपछि संघीय संसद सचिवालयले सांसद र सर्वसाधारणका लागि बस्ने ठाउँमा बार लगाएको थियो। संघीय संसद भवन बार्षिक १५ करोडमा अन्तराष्ट्रिय सम्मेलन केन्द्र विकास समितिसँग सरकारले भाडामा लिएको हो। २०६४ सालदेखि बानेश्वर स्थित विरेन्द्र अन्तराष्ट्रिय सम्मेलन केन्द्र संसद भवनका रुपमा प्रयोग हुँदै आएको छ।
साभार : सेतोपाटी डटकम
Discussion about this post