इटहरी भदौ १२ गते ।
आइसोलेसनमा रहेका कोरोना भाइरस संक्रमित भेट्न घर–घर पुग्ने गरेकी इटहरी उपमहानगरकी उपमेयर लक्ष्मी गौतम गुुर्जो खोज्न जंगल जान थालेकी छिन्।
चिकित्सकले समेत रोगसँग लड्न प्रतिरोधी क्षमता बढाउने उपयोगी जडिबुटी भनेपछि त्यसलाई खोज्न उपमेयर गौतम इटहरी–३ मा रहेको घना जंगलमा सहयोगीहरूसहित पुगेकी हुन्।
आफूले केही दिनलाई पुग्ने गुर्जोको लहरा घर ल्याएको बताइन्। त्यसलाई मसिनो टुक्रा बनाएर संक्रमतिसमक्ष पुर्याउने योजना रहेको सुनाइन्।
‘सुनसरीमा भदौ १५ सम्म निषेधाज्ञा रहेको हुँदा सर्वसाधारणलाई जान गाह्रो भइरहेकाले आफैं जंगल पुुगेर ल्याएकी हुँ,’ उनले भनिन्, ‘यसलाई बनाएर खाने विधिसमेत सिकेको छु, संक्रमति व्यक्तिलाई यसको ज्ञान दिएर आउने गरेकी छु।’
उपमेयर गौतमले दुई दिनदेखि संक्रमितको घरमा पुगेर उनीहरूको स्वास्थ्य अवस्थाबारे जानकारी लिन थालेकी छन्। उनले हालसम्म २५ संक्रमितको घरमा पुगेर मनोबल उच्च बनाउन हौसला दिँदै आएकी छन्।
स्वास्थ्यकर्मीसहित पुगेकी उपमेयरले संक्रमितको घर जाँदा फलफूलसमेत लैजान गरेकी छिन्। त्यसमा गुर्जो अनिवार्य हुनेछ।
‘आफ्नै वरिपरि रहेका यस्ता बहुगुणी औषधीको उपयोग कोरोना संक्रमित भएको बेला मात्र होइन, अरू बेला पनि गर्नुपर्छ,’ उपमेयर गौतमले आयोमेलसँग भनिन्।
आयुर्वेद ज्ञानमा गुर्जोको लहरा रोगसँग लड्न प्रतिरोधी क्षमता बलियो बनाउने बहुउपयोगी औषधी उल्लेख भएअनुसार आफूले आवश्यक गुर्जो संकलनका लागि मंगलबार जंगल गएको बताइन्।
उनले संक्रमति बढ्दै गए मागअनुसार थप गुुर्जो ल्याउने प्रतिबद्धता समेत जनाइन्।
Discussion about this post