बर्दिया पुस १६ गते ।
बर्दियाको राजापुर नगरपालिकाले भर्खरै निर्माण गरेको खानेपानी सरसफाइ तथा स्वच्छता योजना (वास प्लान) को कार्यान्वयन गर्न थालेको छ । जस अन्तर्गत राजापुर नगरपालिकाको वडा नं ४ साझा टोलका २२ घरधुरी र वडा नं ६ दक्षिणपूर महुवा टोलका १३० घरधुरीलाई पूर्ण सरसफाइ उन्मुख टोल घोषणा गरिएको छ । वास प्लानको कार्यान्वयन स्वरुप खानेपानी योजनाहरु सञ्चालन ल्याउनुका साथै बिभिन्न टोलहरुलाइ पूर्ण सरसफाइ उन्मुख घोषणाको कार्यक्रम अगाडि बढाईएको नगरप्रमुख शिवप्रसाद चौधरीले बताउनुभयो ।
पूर्ण सरसफाइ मार्गदर्शन २०७३ अनुसार सम्पूर्ण समुदायहरुमा ५+१ सूचकहरु पुरा गर्दै वडा, नगर तथा जिल्ला तहबाट अनुगमन पश्चात पूर्ण सरसफाइ उन्मुख नमुना समुदाय घोषणा गर्न सकिने उल्लेख छ । सन् २०२७ सम्म पालिकालाई पूर्ण सरसफाइउन्मुख पालिका घोषणा गर्ने लक्ष्य लिएको राजापुर नगरपालिकाले सम्पूर्ण वडाहरुमा यस अभियानलाई तिब्रता दिईएको नगर प्रमुख चौधरीले बताउनुभयो । ‘‘विभिन्न संघ संस्थाहरु सँग साझेदारी गर्दै, नगर तथा वडाको समन्वयमा कार्यक्रम अगाडि बढाईरहेको छ । दिगो विकास लक्ष्य अनुसार खुलादिसामुक्त अभियान पश्चात त्यसको दिगोपना र अबको अभियानमा सबै घरधुरीमा सुरक्षित शौचालय निर्माण गरी नगरलाई खानेपानी तथा सरसफाइ क्षेत्रमा बर्दिया जिल्लाकै नमुना पालिका बनाउने अभियानमा नगरपालिका लागिरहेको छ’’ प्रमुख चौधरीले भन्नुभयो ।
हाल सम्म राजापुर नगरपालिकामा ६ वटा समुदायका ३५४ घरधुरी पूर्ण सरसफाइ उन्मुख घोषणा भैसकेका छन । राजापुर नगरपालिकाको वडा नं ४ साझा टोल र वडा नं ६ दक्षिणपूर महुवा टोल पूर्ण सरसफाइ उन्मुख घोषणा कार्यक्रममा प्रमुख अतिथि चौधरीले पूर्ण अभियानमा सहयोग गर्ने UN-HABITAT/IDS-Nepal धन्यबाद ब्यक्त गर्दै आगामी दिनहरुमा पनि सँगै साझेदारी गर्दै अगाडि बढ्ने प्रतिबद्धता व्यक्त गर्नुभयो । कार्यक्रममा नगर उपप्रमुख मनकला कुमारी चौधरी, वडा अध्यक्ष महेश कुमार चौधरी, IDS का जिल्ला संयोजक यज्ञराज जोशी लागायतले शुभकामना एवं धन्यवाद व्यक्त गर्नुभयो ।
Discussion about this post