पश्चिमी वायु र न्यून चापीय प्रणालीको प्रभावले देशका अधिकांश भागमा बदली

काठमाडौं वैशाख १७ गते ।
देशमा पश्चिमी तथा स्थानीय वायुको प्रभावसँगै पूर्वी भाग नजिक तल्लो वायुमण्डलमा रहेको न्यून चापीय क्षेत्र सक्रिय रहेकाले मौसम बदली भएको छ।

जल तथा मौसम पूर्वानुमान महाशाखाका अनुसार उक्त प्रणालीको प्रभावले हाल देशका अधिकांश स्थानमा बदली रहेको छ। बागमती र गण्डकी प्रदेशका धेरै स्थानमा तथा कोशी, लुम्बिनी र कर्णाली प्रदेशका केही स्थानमा मेघगर्जन, चट्याङ र हुरीसहित मध्यम वर्षा भइरहेको छ। मधेश र सुदूरपश्चिम प्रदेशका एक–दुई स्थानमा पनि यस्तै प्रकृतिको वर्षा भइरहेको महाशाखाले जनाएको छ।

आज दिउँसो देशका अधिकांश भूभागमा सामान्यदेखि पूर्ण बदली रहने पूर्वानुमान गरिएको छ। कोशी र मधेश प्रदेशका साथै हिमाली तथा पहाडी क्षेत्रका केही स्थानमा मेघगर्जन र चट्याङसहित मध्यम वर्षा हुने सम्भावना रहेको छ। हिमाली क्षेत्रमा हल्का हिमपात हुन सक्ने जनाइएको छ।

त्यसैगरी, आज राति हिमाली क्षेत्रमा सामान्य बदली तथा पहाडी र तराई क्षेत्रमा आंशिक बदली रहने अनुमान गरिएको छ। महाशाखाका अनुसार कोशी, बागमती र गण्डकी प्रदेशका हिमाली तथा पहाडी भूभागका केही स्थानमा तथा अन्य प्रदेशका केही स्थानमा मध्यम वर्षासँगै हिमपातको सम्भावना रहेको छ।