सरला सुवेदी
बाँके साउन २७ गते ।
लामो समय कोरोना महामारिले गर्दा शैक्षिक क्षेत्र बन्द भएसङ्गै बाँकेको कोहलपुर नगरपालिका वडा नं. २ मा रहेको शिवशक्ति आधारभूत विद्यालय प्रविधिमैत्री हुने भएको छ ।
कोहलपुर नगरपालिकाको दरबन्दी मिलान कार्य अन्तर्गत पहिले लक्ष्मी माविका प्रधानाध्यापकका रुपमा रहेका बद्रीनाथ सापकोटा शिवशक्ति आधारभूत विद्यालयको प्रधानाध्यापकका रुपमा सरुवा भएसँगै हाल विद्यालयलाई प्रविधिसँग जोड्ने अभियान सुरु भएको छ ।
विद्यालयका प्रअ सापकोटाले विद्यालयमा आवश्यक पर्ने प्रविधिहरुको जडान गरी विद्यालयलाई प्रविधिमैत्री बनाउने अभियानमा लागिएको बताएका छन् । कोहलपुर नगरपालिकाको आर्थिक सहयोगमा इन्टरनेटको जडान विद्यालयमा गरिनुका साथै अनलाईन कक्षा संचालनका लागि शिक्षकहरुलाई प्रशिक्षण दिने कार्य सुरु गरिएको उनले बताएका छन् ।
विद्यालयमा रहेका शिक्षकहरुलाई अनलाईन कक्षा संचालनका लागि मध्यपिश्चम विश्वविद्यालय बागेश्वरी बहुमुखि क्याम्पस कोहलपुरका अभ्यास शिक्षण विभाग प्रमुख प्रमोद सुवेदीले प्रशिक्षण दिएका छन् ।
कोरोना भाईरसका कारण विद्यालयमा भौतिक रुपमा विद्यार्थीहरुको उपस्थिति गराई शिक्षण सिकाइ क्रियाकलाप गर्न सक्ने अवस्था नरहेको बेला वैकल्पिक माध्यमबाट पठनपाठन गर्नका लागि आवश्यक सहयोग गरेकोमा शिक्षा यूवा तथा खेलकुद शाखा कोहलपुरलाई प्रअ सापकोटाले धन्यवाद समेत दिएका छन् ।
साथै विद्यालयको भौतिक र शैक्षिक विकासका लागि सबैले साथ र सहयोग गर्न अनुरोध गर्दै विद्यालयमा कक्षा ८ सम्म केहि वर्ष भित्र संचालन गरी उच्च शिक्षासम्मको पठनपाठन गराउन सक्ने बनाउन लागि परेको प्रअ सापकोटाले बताएका छन् ।
यस्तै प्रशिक्षक प्रमोद सुबेदीले लामो समयदेखी शैक्षिक क्षेत्र भौतिक रुपमा सन्चालन हुन नसक्दा सम्पुर्ण शैक्षिक क्षेत्र नै धरासय मा परेको बताए। लकडाउन भएसङ्गै पठनपाठन बन्द भएकाले विद्यार्थी भाइबहिनीमा बौद्धिक रुपमा नकारात्मक असर परेको र अबका दिनमा भौतिक रुपमा शैक्षिक क्षेत्रलाई संचालन गर्न न सकिए पनि प्रबिधि मार्फत पनि शैक्षिक क्षेत्र सन्चालन गर्न नसकिए सम्पुर्ण शैक्षिक क्षेत्र नै धरासयमा पर्न सक्ने उनले बताए ।
प्रबिधिको प्रयोग गरेर भएनी पढाईमा विद्यार्थीलाई थोरै समय भएनि व्यस्त राख्न सके पनि प्रबिधिको सहि सदुपयोग र उपलब्धि हुने बताए ।
Discussion about this post