बाँके, असोज १६ गते ।
नेपालगन्जस्थित भेरी अस्पतालले विभिन्न आन्दोलन, सशस्त्र द्वन्द्व तथा प्राकृतिक प्रकोपमा घाइते भएकाहरूलाई निःशुल्क औषधोपचार सेवा दिने भएको छ ।
नेपालमा भएका विभिन्न आन्दोलन, द्वन्द्व तथा प्राकृतिक प्रकोपका घाइतेको निःशुल्क उपचार गरेबापत अस्पताललाई शोधभर्ना दिने कार्यविधि, २०८२ अनुसार उपचार सेवा उपलब्ध गराइने अस्पतालका प्रमुख मेडिकल सुपरिटेन्डेन्ट डा. नवीन दर्नालले बताए ।
उनका अनुसार १० वर्षे सशस्त्र द्वन्द्व, २०६२/६३ को जनआन्दोलन, तराई–मधेश आन्दोलन, जेनजी आन्दोलन तथा विभिन्न प्राकृतिक प्रकोपका क्रममा घाइते भएकाहरूले निःशुल्क उपचार सेवा पाउनेछन् ।
२०५२ सालदेखि २०६३ मङ्सिर ५ गतेसम्म भएको सशस्त्र द्वन्द्वका घाइते, २०६२/६३ को जनआन्दोलनका घाइते तथा प्राकृतिक प्रकोपमा परी घाइते भएकाहरूलाई कार्यविधिअनुसार उपचार सेवा उपलब्ध गराइने डा. दर्नालले जानकारी दिए ।
त्यसैगरी, २०८१ चैत १५ गते काठमाडौंको तीनकुनेमा भएको प्रदर्शनमा घाइते भएका तथा २०८२ भदौ २३ र २४ गतेको जेनजी आन्दोलनका क्रममा घाइते भएकाहरूले पनि निःशुल्क उपचार पाउनेछन् ।
जेनजी आन्दोलनका क्रममा भेरी अस्पतालमा २५ जना घाइतेको उपचार गरिएको डा. दर्नालले बताए । विभिन्न आन्दोलन तथा प्राकृतिक प्रकोपका क्रममा घाइते भई अङ्गभङ्ग भएका व्यक्तिलाई समेत कार्यविधिअनुसार निःशुल्क औषधोपचारको व्यवस्था गरिएको उनले जानकारी दिए ।
निःशुल्क उपचार सेवा लिन गृह मन्त्रालय वा जिल्ला प्रशासन कार्यालयबाट जारी भएको घाइतेको पहिचान खुल्ने परिचयपत्र अनिवार्य गरिएको अस्पतालले जनाएको छ ।
स्थानीय तह वा वडाको सिफारिसका आधारमा मात्रै निःशुल्क उपचार सेवा उपलब्ध गराउन नसकिने डा. दर्नालले बताए ।
‘कार्यविधिमा तोकिएअनुसार निःशुल्क उपचार लिन गृह मन्त्रालय वा जिल्ला प्रशासन कार्यालयबाट जारी भएको घाइते परिचयपत्र अनिवार्य छ,’ उनले भने, ‘वडा तथा स्थानीय सरकारको सिफारिसका आधारमा मात्रै यो सेवा दिन सकिँदैन ।’
घाइतेको उपचार व्यवस्थापनलाई सहज र व्यवस्थित बनाउन अस्पतालले मेडिकल अधिकृत अनुपम सिंह थापालाई फोकल पर्सनको जिम्मेवारी दिएको छ । फोकल पर्सनमार्फत निःशुल्क उपचारसम्बन्धी आवश्यक समन्वय तथा व्यवस्थापनमा सहजीकरण गरिने अस्पतालले जनाएको छ ।
Discussion about this post