कोहलपुरमै रेबिजविरुद्धको खोप सेवा सुरु हुँदै

बाँके, असोज १६ गते ।
कोहलपुर र आसपासका नागरिकले अब रेबिजविरुद्धको खोप लगाउन नेपालगन्ज धाउनुपर्ने बाध्यता हट्ने भएको छ । कोहलपुर नगर अस्पतालले असोज १९ गतेदेखि पहिलोपटक एन्टिरेबिज भ्याक्सिन (एआरभी) सेवा नियमित रूपमा सञ्चालनमा ल्याउन लागेको हो ।

कोहलपुर नगरपालिका–११ स्थित नगर अस्पतालबाट सेवा सुरु भएपछि कोहलपुरसहित बैजनाथ र राप्तीसोनारीका नागरिक लाभान्वित हुनेछन् । यसअघि कुकुर वा अन्य जनावरले टोकेपछि रेबिजविरुद्धको खोप लगाउन नेपालगन्जस्थित भेरी अस्पताल पुग्नुपर्ने बाध्यता थियो ।

कोहलपुर नगर अस्पतालका जनस्वास्थ्य अधिकृत प्रकाश विश्वकर्माले अब नागरिकले घरनजिकैबाट खोप र आवश्यक चिकित्सकीय परामर्श पाउने बताए । उनले सेवा सुरु भएपछि उपचारका लागि लाग्ने समय र खर्च बचत हुने जानकारी दिए ।

“कुकुर वा अन्य जनावरले टोकेपछि खोप लगाउन नेपालगन्ज जानुपर्ने बाध्यता थियो,” उनले भने, “अब कोहलपुर, बैजनाथ र राप्तीसोनारीका नागरिकले नगर अस्पतालबाटै सेवा लिन सक्नेछन् ।”