बाँके जेठ २४ गते ।
न्याय मरेको देशमा न्याय खोज्दै अछाम देखि आफ्नो कुरा कसैले नसुनेको भन्दै विनोद शाही हत्या प्रकरणमा मृतक शाहीका आफन्त र साथिभाईहरुले बाँके जिल्लामा पत्रकार सम्मेलन गरेका छन।
उनीहरुले बाँकेको कोहलपुर र नेपालगञ्जमा छुट्टाछुट्टै पत्रकार सम्मेलन मार्फत न्यायका लागि सहयोग गर्नाका लागि पत्रकारहरु सँग आग्रह गरेका छन। पत्रकार सम्मेलनमा उनीहरुले पिडित पक्षको जाहेरी प्रहरीले नबुझेको आरोप समेत लगाएका छन।
उनीहरुले न्यायका लागि सबै जिल्लाहरुमा पत्रकार सम्मेलन ,मानव अधिकार आयोग लगाएत निकायमा समेत ध्यानआकर्षण गराउनुका साथै जिल्ला प्रशासन मार्फत प्रधामन्त्रीलाई ज्ञापन पत्र समेत बुझाउने कार्य तालिका रहेको बताएका छन। उनीहरुले शाहीको मृत्युमा स्थानीय सरकार प्रमुख जिम्मेवार रहेको बताउदै प्रहरीले पिडित पक्षको जाहेरी समेत लिन नमानेको आरोप लगाएका हुन ।
पञ्चदेवल विनायक नगरपालिका– ४ का १६ वर्षीय विनोद शाही शनिवार बिहान घर नजिकैको भिरमा मृत अवस्थामा फेला परेका थिए। स्थानीयले उनको हत्या भएको भन्दै आन्दोलन गरिरहेका छन् । प्रहरीले घटनाबारे तथ्य सार्वजनिक गर्न सकेको छैन ।
दोषी पक्राउ नपरेको मृतकका आफन्तहरूले अझै शव उठाउन मानेका छैनन् । जेठ १७ गते साँझ नेपाली कांग्रेस र नेकपा एमालेका कार्यकर्ताबिच पञ्चदेवलमा विवाद भएको थियो । त्यसपछि बेपत्ता भएका शाहीको शव शनिवार बिहान स्थानीयले फेला पारेका थिए।
निर्वाचनका क्रममा शाही एमालेको प्रचारमा सक्रिय थिए। सोही कारण उनको हत्या भएको आरोप आफन्तले लगाएका छन्।
विद्यामन्दिर उच्च माविको कक्षा १० मा अध्ययनरत शाही शङ्कास्पद अवस्थामा मृत भेटिएपछि घटनाको चौतर्फी विरोध भइरहेको छ।
विद्यामन्दिर मावि विनायक, षोडशादेवि मावि मङ्गलसेन, अछाम बहुमुखी क्याम्पसका विद्यार्थीहरूले मंगलवार पनि दोषीलाई कारबाही र पीडितलाई न्यायको माग गर्दै आन्दोलन गरेका छन्। सदरमुकाम मंगलसेन विद्यार्थीहरूले पनि जिल्ला प्रशासन तथा प्रहरी कार्यालय अगाडी प्रदर्शन गरेका छन्।
आन्दोलित आफन्तहरूले सोमवार विनायक बजारमा नगर प्रमुख अम्बिका चलाउने, अछामका प्रहरी प्रमुख रविराज थपलिया र निवर्तमान वडा अध्यक्ष सज्जन बहादुर शाहीको पुतला दहन गरेका थिए ।
किशोरको हत्यामा संलग्न रहेको भन्दै नगर प्रमुख चलाउने, निवर्तमान वडा अध्यक्ष सज्जन शाही र अपराध निम्त्याउन भूमिका खेलेको भन्दै प्रहरी प्रमुख थपलियाको पुतला दहन गरेका हुन्।
स्थानीय आन्दोलित भएपछि पञ्चदेवल विनायक नगरपालिकाकी मेयर सदरमुकाम मंगलसेनमा बस्न थालेकी छन्। मेयर अम्बिका चलाउने आफू विरुद्ध नाराबाजी भएपछि असुरक्षित ठहर गर्दै सदरमुकाम सरेकी हुन्।
घटनामा आफूलाई लगाएको आरोप झुटो भएको भन्दै दोषी जोसुकै भए पनि घटनाको सत्य तथ्य छानबिन गर्न आफू पनि लागेको उनले बताइन्। मेयर चलाउनेकै संलग्नतामा किशोरको हत्या भएको एमाले कार्यकर्ताले आरोप लगाएका छन्।
अनुसन्धानका लागि सुदूरपश्चिम प्रदेश प्रहरी कार्यालयले संघीय प्रहरी इकाई महेन्द्रनगरका प्रमुख प्रहरी वरिष्ठ उपरीक्षक (एसएसपी) जनकराज पाण्डे नेतृत्वको टोली खटाएको छ। सुदूरपश्चिमका प्रमुख प्रहरी नायब महानिरीक्षक (डीआइजी) मोहनकुमार आचार्यका अनुसार अपराध अनुसन्धानका लागि एसएसपीको नेतृत्वमा खटाइएको टोली अछाम पुगिसकेको छ।
आजदेखि एसएसपी नेतृत्वको टोलीले काम सुरु गर्ने उनले बताएका छन्। यसअघि सीआईबीका डिएसपी मनोहरप्रसाद भट्टको कमान्डमा ६ सदस्यीय टोली पनि खटाइएको छ। प्रदेश प्रहरी कार्यालयले पठाएको सीआइबी टोलीले पनि घटनाबारे अनुसन्धान गरिरहेको जनाएको छ । प्रहरीले तालिम प्राप्त कुकुरको प्रयोग गर्दा पनि अझै दोषी पक्राउ पर्न सकेका छैनन् ।
Discussion about this post