धनगढी असार २७ गते ।
नेकपा एकीकृत समाजवादीका अध्यक्ष माधवकुमार नेपालले आगामी संघ र प्रदेशको निर्वाचन अघि कुनैपनि पार्टीसँग एकता नहुने बताएका छन्। उनले तालमेल हुन सक्ने तर एकता भने नहुने स्पष्ट पारेका हुन्।
सोमबार धनगढीमा समाजवादी प्रेस संगठाद्वारा आयोजित पत्रकार सम्मेलनमा समाजवादीका अध्यक्ष नेपालले अहिलेकै गठबन्धन आगामी निर्वाचनसम्म निरन्तर रहने बताए।
उनले भने, ‘हाम्रो पार्टीमा गठबन्धनलाई निरन्तरता दिने कुरामा सबै एकमत हुनुहुन्छ, कोही व्यक्तिले बोलेको अर्थ रहँदैन, संगठनको निर्णय नै अन्तिम हो।’
बाम एकताको कुरा चलिरहेको छ नि भन्ने संचारकर्मीको जिज्ञासामा अध्यक्ष नेपालले भने, ‘बामपन्थी विचार बोकेका सबै शक्तिलाई एकै ठाउँमा उभ्याउने पहल भइरहेको छ तर संविधान नमान्ने, संघीयता नमान्ने, राष्ट्रको हितविपरीत हिँड्ने शक्ति बामपन्थी भए पनि एकता हुँदैन।’ उनले अहिलेकै गठबन्धनका कारण संविधान, संघीयता र राष्ट्रिय हित बचेको उल्लेख गर्दै यो गठबन्धनको विकल्प नरहेको बताए।
‘एकीकृत समाजवादी राष्ट्र र जनताको हितका लागि निर्माण भएको पार्टी हो’ , अध्यक्ष नेपालले भने, ‘हामी विचार र सिद्धान्तप्रति प्रतिवद्ध छौँ, अवसरवादी होइनौँ।’
सुदूरपश्चिम प्रदेशमा एकीकृत समाजवादी सबैभन्दा ठुलो दल भएकाले समाजवादीको नेतृत्वमा प्रदेश सरकार बन्नु स्वाभाविक रहेको बताउँदै नेता नेपालले तर एक्लैले सरकार निर्माण नहुने हुँदा अन्य दलको सहयोग आवश्यक रहेको उल्लेख गरे।
नेता नेपालले भने, ‘हाम्रो पार्टी निर्माण भएको दश महिना भयो दश महिनामा धेरै संगठन विस्तार भएको छ। आगामी निर्वाचनअघि बाँकी रहेका सम्पूर्ण ठाउँमा संगठन बिस्तार गर्ने अभियानमा हामी लागेका छौँ।’
उनले स्थानीय तह निर्वाचनमा केही तीता र केही मिठा अनुभव बटुलेको पनि बताए। उनले भने, ‘अब ती अनुभवलाई लिएर थप संगठन बिस्तार र गठबन्धनलाई थप बलियो बनाउने छौँ।’ पार्टीकै गतिविधि बुझ्न आफू धनगढी नेता नेपालको भनाइ छ।
Discussion about this post