रौतहट, कात्तिक २२ गते।
नेपाल संघीय समाजवादी पार्टीले रौतहट जिल्ला अधिवेशन आगामी पुस २४ गते गर्ने निर्णय गरेको छ। पार्टीका केन्द्रीय अध्यक्ष तथा पूर्वगृहराज्यमन्त्री मोहम्मद रिजवान अन्सारीको उपस्थितिमा बसेको जिल्ला कमिटी बैठकले गरुडामा अधिवेशन गर्ने निर्णय गरेको हो।
रौतहट जिल्ला इन्चार्ज लक्ष्मी साह सुनारको अध्यक्षतामा बसेको बैठकमा पार्टीका केन्द्रीय सदस्य शेख मौलाना वकिललगायत जिल्ला तथा स्थानीय तहका नेता–कार्यकर्ता सहभागी थिए।
बैठकमा अध्यक्ष अन्सारीले आगामी निर्वाचनलाई लक्षित गरेर पार्टी संगठन विस्तार र कार्यकर्ता परिचालनमा जोड दिए। उनले पार्टीका नीति, विचार र राजनीतिक एजेन्डा जनतामाझ पु¥याउन संगठनात्मक गतिविधि तीव्र बनाउनुपर्ने बताए। उनले अग्रगामी मोर्चालाई पनि थप सशक्त र संगठित बनाउनुपर्ने बताए।
अन्सारीले वर्तमान सरकारको कार्यशैलीप्रति असन्तुष्टि जनाउँदै सरकारका केही निर्णय लोकतान्त्रिक मूल्य र मान्यताविपरीत रहेको आरोप लगाए। नेपाल प्रहरीको प्रहरी महानिरीक्षक (आईजीपी) नियुक्तिलगायत विषयमा सरकारको निर्णय प्रक्रियामाथि प्रश्न उठाउँदै उनले राज्यका सबै निर्णय संविधान र कानुनअनुसार हुनुपर्ने बताए।
सरकारका पछिल्ला गतिविधिमा निरंकुश र तानाशाही प्रवृत्ति देखिन थालेको भन्दै उनले त्यसको विरोध गरे। लोकतान्त्रिक व्यवस्थामा विधिको शासन, पारदर्शिता र नागरिक स्वतन्त्रताको सम्मान हुनुपर्ने उनको भनाइ थियो।
उनले राष्ट्रिय हित, लोकतान्त्रिक अधिकार र नागरिक स्वतन्त्रताको रक्षाका लागि राजनीतिक दल तथा नागरिक समाजले सरकारका गतिविधिमाथि खबरदारी गर्नुपर्ने बताए।
बैठकले आगामी पुस ३ गते जिल्ला कमिटीको अर्को बैठक बस्ने निर्णयसमेत गरेको छ। त्यस्तै, रौतहटका चारवटै प्रतिनिधिसभा निर्वाचन क्षेत्र, मधेश प्रदेशका आठवटै प्रदेशसभा निर्वाचन क्षेत्र र जिल्लाका सबै वडामा संगठन विस्तार गर्ने निर्णय गरेको छ।
पार्टीले साधारण तथा सक्रिय सदस्यता वितरण अभियान सञ्चालन गरी नयाँ सदस्यलाई संगठनमा आबद्ध गराउने जनाएको छ। दीपावली र छठ पर्वका अवसरमा जिल्लाका सबै पालिकामा शुभकामना आदानप्रदान कार्यक्रम गर्ने निर्णय पनि बैठकले गरेको छ।
त्यसैगरी, प्रत्येक पालिकामा जनजागरण सभा सञ्चालन गरी सामाजिक न्याय, समानुपातिक समावेशिता, संघीयता र जनअधिकारका विषयमा नागरिकलाई जागरुक बनाउने निर्णय गरिएको छ।
अध्यक्ष अन्सारीले सामाजिक न्याय, पहिचान, संघीयता, उत्पीडित समुदायको अधिकार र राजनीतिक प्रतिनिधित्वलाई पार्टीका प्रमुख एजेन्डाका रूपमा अघि बढाउनुपर्ने बताए। उनले आगामी निर्वाचनसम्म अग्रगामी मोर्चालाई सशक्त बनाउँदै लैजाने बताए।
मोर्चामा आबद्ध राजनीतिक दल, नेता तथा कार्यकर्ताबीच एकता, सहकार्य र समन्वय आवश्यक रहेको उनको भनाइ थियो।
बैठकले जिल्लामा सञ्चालन गरिने संगठन विस्तार, सदस्यता वितरण र जनजागरण अभियानलाई पार्टीको राष्ट्रिय संगठन निर्माण अभियानसँग जोडेर अघि बढाउने निर्णय गरेको छ।
Discussion about this post