बाँके असोज १८ गते ।
जनता समाजवादी पार्टीबाट निर्वाचित प्रतिनिधि सभा सदस्य (सांसद) प्रदीप यादवले सामाजिक सद्भाव माथि खलल पुर्याउने जो कोहिलाई कारवाहीको दायरामा ल्याउन सरकारको ध्यानाकर्षण गराएका छन् ।
प्रतिनिधि सभाको बैठकमा बोल्दै यादवले धार्मिक गुरुले सामाजिक सद्भाव विगार्ने अभिव्यक्ति दिएको पाइए कारवाही गर्नुपर्ने बताए । ‘मन्दिरका पूजारी महन्थ होवस वा मस्जिदका धर्म गूरु मोल्वी किन नहोवस सद्भाव विगार्ने काम गरे कारवाहीको भागिदार हुनुपर्छ,’ उनले भने ।
उनले धार्मिक तथा सामाजिक सद्भावका खलल पुर्याउने भइरहेका गतिविधि अचानक नभई नियोजित तरिकाले भइरहेको जिकिर गरे । ‘दंगा अकस्मात हुँदैन । पहिले छर्ने, मलजल गरेर हुर्काएपछिमात्र हुन्छ । सामाजिक सद्भाव विगार्ने अहिले भइरहेका गतिविधि अचानक भएका होइनन् । नियोजित तरिकाले भइरहेको छ । यसको अनुसन्धान गर्न आवश्यक छ,’ उनले भने ।
सांसद यादवले पूर्वराजा ज्ञानेन्द्र शाहको लोकतन्त्र विरोधी गतिविधिको निगरानी गर्नुपर्ने बताएका छन् । उनले अहिले राजावादी हुँ भन्नेहरू हौसिएको आरोप लगाए । ‘अहिले आफूलाई राजावादी भन्नेहरू किन हौसिएका छन् ?,’ उनले भने, ‘कतै आगो लगाएर न्यानो ताप्ने योजना त छैन यिनीहरूको ? जनतामा आशंका छ । पूर्वराजा ज्ञानेन्द्र शाहको लोकतन्त्र विरोधी गतिविधिको निगरानी गर्नुपर्छ । संघीय गणतन्त्र ठूलो बलिदानबाट आएको हो ।’
मधेसको राजनीतिक ताकतमा हिन्दु र मुस्लिम समुदायको साझा एकता भएको उनले औँल्याए । मधेसलाई तहसनहस पार्न धार्मिक सद्भाव खलबल्याउने काम गरिदै छ । मधेसी र मुस्लिमको एकताले मधेसको अधिकार स्थापित भएको हो ।
मधेसी र मुस्लिमलाई फुटाएर फाइदा लिन खोज्नेले त्यसको परिणाम नराम्रो भोग्नुपर्ने छ,’ सांसद यादवले चेतावनी दिँदै भने, ‘अग्नीको ज्वालाले एउटा घरलाई मात्र जलाउँदै त्यसले नजिकको घरमा पनि क्षति पुर्याउँछ । शान्त तलाउ जस्तै रहेको मधेसमा ढुंगा फालेर तरंगित पार्ने काम नगरियोस । त्यो हामीलाई सह्य हुने छैन ।’
भिडियो हेर्नुस् ।
Discussion about this post