करोड खर्चेको चिस्यान केन्द्र प्रयोगविहीन

प्यूठान असोज १९ गते ।
प्यूठान जिल्लामा निर्माण गरिएको चिस्यान केन्द्र (कोल्ड स्टोर) प्रयोगविहीन बनेको छ । करोडौँको लगानीमा निर्माण सम्पन्न भएका चिस्यान केन्द्र प्रभावकारी रूपमा सञ्चालनमा नल्याउँदा प्रयोगविहीन भएको हो ।

प्युठान नगरपालिका –४ विजुवारमा लुम्बिनी प्रदेश सरकार र प्युठान नगरपालिकाको साझेदारीमा एकसय मेट्रिक टन क्षमताको चिस्यान केन्द्र निर्माण गरिएको हो । लुम्बिनी प्रदेश सरकारको ९० लाख र प्युठान नगरपालिकाको ५९ लाख रुपियाँको लागतमा चिस्यान केन्द्र निर्माण भए पनि त्यसको किसानले उपयोग गर्न पाएका छैनन् ।

२०७८ जेठ १ गतेदेखि सञ्चालनमा ल्याइए पनि किसानले राखेका आलु, प्याजका बिउँ चिस्यान केन्द्रमै उम्रिएका थिए । चिस्यान केन्द्रलाई व्यवस्थित बनाउने योजनामा नगरपालिका रहेको नगर प्रमुख विष्णुबहादुर योगीले बताउनुभयो । चिस्यान केन्द्रको प्राविधिक पक्षलाई सुधार गरी किसानको उत्पादनलाई सुरक्षित राख्न पहल गर्ने उहाँको भनाइ छ ।

माण्डवी गाउँपालिकामा लुम्बिनी प्रदेश सरकार र गाउँपालिकाको साझेदारीमा एकसय मेट्रिक टन क्षमताको चिस्यान केन्द्र बनेको हो । एक करोड १२ लाख ५८ हजार आठ सय १८ रुपियाँ लागतमा केन्द्र निर्माण भए पनि चिस्यान केन्द्र प्रयोगविहीन छ ।