बाँके असोज १८ गते ।
समाजमा उदण्ड मचाउनेलाई कानुन बमोजिम कारवाही गर्नुपर्ने पूर्वमन्त्री मोहम्मद इस्तियाक राईले बताएका छन् । उनले सामाजिक एवम् धार्मिक सद्भावमाथि खलल पुर्याउनेको पहिचान गरि कारवाहीको दायरामा ल्याउन प्रशासनसँग माग गरेका छन् ।
एउटा फेसबुक स्टाटसले गर्दा आक्रोश उत्पन्न हुँदा कारवाही नहुँदा सामाजिक सद्भाव खलबलिएको बताउँदै उनले कारवाही गर्न खोज्दा नभेटिएको बताए । ‘मेरो जानकारी अनुसार कारवाही गर्न खोजिएकै हो, तर, स्टाटस लेख्ने ब्यक्ति फेला परेनन्,’ पूर्वमन्त्री राईले भने, ‘फेसबुक स्टाटसलाई लिएर हाम्रै पार्टीको जनप्रतिनिधिबाट उदण्डता देखाइयो । त्यो उदण्डताको जति निन्दा गरेपनि कमै हुन्छ ।
उदण्डता देखाउनेलाई कानुन बमोजिम कारवाही हुनुपर्छ ।’
उनले गाई इस्यु र केटाकेटीको प्रेम विहेवारीलाई राजनीतिक मुद्दा बनाइने गरेको बताउँदै उनले यसले सामाजिक द्वन्द्व निम्त्याउने गरेको बताए । ‘कसैलाई शंका लाग्छ भने जाऔँ त्यो गाउँ नै घेरौँ र त्यो व्यक्तिलाई मुद्दा लगाऔँ,’ पूर्वमन्त्री राईले भने, ‘दुई पक्षलाई लडाएर लाभ लिनेको पहिचान गरे हिन्दू र मुस्लिम लडाउने षडयन्त्र समाप्त हुनेछ । राजनीतिक दवाव कसले दिन्छ भन्ने त्यो सार्वजनिक गरिदिनु पर्छ ।’
मुस्लिमले कुनै गल्ती गर्ने वित्तिकै आफूमाथि आक्षेप लाग्ने गरेको प्रति इंगित गर्दै उनले समाजलाई विखण्डन गरेर फाइदा लिने कुरा आफूले सोच्न समेत नसक्ने बताए । ‘उदण्ड सबै समाजमा छन् । उदण्डता देखाउने हाम्रो पार्टीकालाई गल्ती महशुस हामी गराउँछौं । सामाजिक सञ्जालमा त्यस्ता कुरा सम्प्रेषण गर्नेहरु माथि मुद्दा दायर गरेर कानुनी दायरामा ल्याउनु पर्छ,’ उनले भने, ‘दुई समुदायका उदण्डको पहिचान गरेर कानुनी दायरामा ल्याऔं । उनीहरुलाई सजाय दिएपछि मात्र भोलीको दिनमा यस्तो अवस्था सिर्जना हुँदैन ।’
नेपालगन्जका सबैले शान्ति चाहेको बताउँदै उनले थप उदण्डता हुन नदिन सवैको साथ सहयोग आवश्यक भएको औँल्याए । ३० बर्ष अघि भएको घटनाको स्मरण गर्दै राईले त्यसको पीडा नेपालगन्जबासीले अहिलेसम्म भुल्न नसकेका बताए । ‘हिंसाले केहि दिँदैन, गुमाउने मात्र हो । ३० वर्षअघि भएको घटनाले के दियो । अहिलेको घटनाबाट के पायौँ ? सवैले मनन् गरि शान्ति, सद्भावका लागि हातेमालो गरौँ,’ उनले भने ।
मैले साढे तीन महिनाअघि गृहमन्त्रीलाई लिखित जानकारी गराएको थिएँ
नेपालगन्जमा सामाजिक सद्भाव विथोल्ने प्रयास भइरहेको भन्ने जानकारी आफूले साढे तीन महिनाअघि नै सरकारलाई गराएको पूर्वमन्त्री राईले खुलासा गरेका छन् । उनले पूर्वको धरान र मधेस प्रदेशको मलंगवापछि नेपालगन्जको सद्भाव विगार्ने प्रयास भइरहेको जानकारी सरकारलाई ३ असारमा नै गराएको स्पष्ट पारे । ‘नेपालगन्जको सद्भाव विगार्न विभिन्न तत्व सक्रिय भएको जानकारी मैले तीन महिनाअघि गृहमन्त्री नारायणकाजी श्रेष्ठलाई पत्र लेखेर गराएको थिएँ । त्यतिबेला उहाँ (गृहमन्त्री ज्यु) ले यो विषयलाई गम्भिरतापूर्वक लिनु भएन । त्यसको परिणाम आज देखियो,’ उनले भने ।
अहिले धर्मका नाममा बाँके जिल्लामा कैयौँ व्यक्ति, समूह र संस्थाले सीमा नाघेको बताउँदै पूर्वमन्त्री राईले आफ्नो धर्म, सम्प्रदायको संरक्षण र प्रबर्धन गर्नुभन्दा विपरित धर्ममा आस्था राख्ने विरुद्ध दुष्प्रचार र आरोप प्रत्यारोप तर्फ उन्मुख भएको उनको भनाई छ । उनले भने, ‘यहाँको सामाजिक सद्भावमा खेल्ने काम भइरहेको छ । अराजक तत्वले प्रशय पाइरहेको छ । यसमा प्रहरी, प्रशासन गम्भिर भएर लाग्न आवश्यक छ ।’
उनले अराजग गतिविधि उपर निगरानी गर्ने र नियन्त्रणमुखी उपाय अपनाउनेतर्फ जिल्लास्थित सुरक्षा तथा प्रशासनिक अंगहरूबाट खासै सक्रियता र जिम्मेवारी बहन गरेको नदेखिएको लिखित जानकारी गृहमन्त्रीलाई दिएको उनको भनाई छ । ‘धार्मिक समुदायका व्यक्तिहरू दवावको महसुस गरिरहेका छन् । उनीहरूको आक्रोश आफू विरुद्ध भइरहेका गतिविधिको प्रतिकारमा बदलिन नदिनेतर्फ राज्य यथाशीघ्र चनाखो हुन जरुरी छ,’ नेपालगन्ज निवासी समेत रहेका पूर्वमन्त्री राईले गृहमन्त्रीलाई लेखेको पत्रमा उल्लेख छ ।
पत्रमा उनले आफूले लेखेको नेपालगन्जको समग्र परिस्थितिलाई गृहमन्त्री ज्यूले मनन् गरि कदम चाल्ने आशा व्यक्त गरेका थिए । उनले पत्रमा भनेका थिए, ‘वर्तमानमा भएको चुकले भविष्यका सम्भावित घटनालाई परिस्थितिजन्य भन्नुपर्ने अवस्था आउन दिनुहुने छैन भन्ने अपेक्षाका साथ सामाजिक सद्भाव चाहने बाँकेवासीका तर्फबाट तपाईंलाई यो पत्र लेखेको हुँ । आशा छ, यो विषयमा गृहमन्त्रीज्यूको ध्यानाकर्षण हुनेछ ।
शान्ति सुरक्षाको पर्याप्त तयारी हुनेछ ।’
उनले पत्रमा भनेका थिए, ‘धार्मिक–सामाजिक सद्भाव जोगाउँदै विद्यमान शासन व्यवस्था नै मास्ने प्रतिगामी शक्तिहरूको कुत्सित मनसाय पूरा हुन नदिन कारबाही प्रक्रिया अघि बढाइनेछ भन्ने आशा छ ।’
नेपालगन्जको असहज परिस्थितिलाई मध्यनजर गरि बाँके प्रशासनले अनिश्चितकालिन कर्फ्यु लगाएपछि गृहमन्त्रीले आफूलाई दुई पटक फोन गरेको उनले बताए । ‘तपाईंले पहिले भने जस्तै अवस्था आयो । पहिले नै परिस्थितिलाई गम्भीरतापूर्वक लिइएको भए यो अवस्था आउँदैनथ्यो,’ गृहमन्त्रीको भनाई उदृध गर्दै राईले भने ।
Discussion about this post